Silistre sahrâsı madrab-ı hıyâm-ı ‘asâkir-i İslâm ve Kili ve İsmâ‘îl taraflarına mehmâ-emken takviye vü istihkâm verilüp, bi'l-fi‘l Kul Kethûdâsı olan İsmâ‘îl Ağa dahi Ordu Ağalığı'yla cânib-i mezkûra meʼmûr ve ma‘iyyetine ‘asker-i mevfûr verildiginden gayri hılâl-i râhda bulduğu erbâb-ı harb ü darbı maʻiyyetine istishâb u sevk içün yedine emr-i ‘alî it‘â ve mevkib-i hümâyûnun ilerüce hareketinde fâyideten-mâ husûlünü baʻzı müdebbirân ilkā eylediklerine binâ'en, Saferü'l-hayr'ın dokuzuncu günü Silistre'den tahrîk-ı ikdâm ve dört sâʻat ilerüde vaki‘ Bakīkırı demekle maʻrûf sahrâ-yı pehnâ rabt-ı evtâd-ârâm olundu. Ferdâsı bir meclîs-i hâfil tertîb olunub, Moskovlu ile bi'n-nefs muhârebe matlûb ve İsmâ‘îl tarafının takviyesi vâsıl-ı derece-i vucûb olduğu Serdar-ı ekrem tarafından işʻâr ve fîmâ-baʻd ne gûne hareket iktizâ eyleyeceği ‘alâ-tarîkı'l-ilhâh istihbâr olundukda, huzzârın cümlesi ser-be-zemîn efkâr ve şahs-ı [67a] vâhidde cesâret güftâr olmayup, bilâhare [mısra]: Lehû libedün ezfârühû lem tükallemi mefhûmuna mâ-sadak olan Ordu Kadısı Keçeci-zâde Efendi derîçe-bâz-ı kelâm ve Teşrîn-i evvel duhûlüyle nev‘-i insân ve cins-i hayvânın ilerüye hareketi mümteni‘ olup, 'ale'l-husûs Yergöğü'den bu mahalle vürûd edinceye dek fî-külli-yevm süvârî vü piyâdenin cümlesi arzû-yı vatan ile 'avdetine kıyâm ve'l-hâletü hazihî mevcûd-ı Ordu-yi hümâyûn ricâl-i devlet ve Ocak ağalarından ‘ibâret olup, ilerüye hareketin fâyidesi olmadığını ifhâm eyledikde, mûmâ ileyhin tertîb etdiği mukâddemâ ehvâ-yı nâsa muvâfık olduğundan, taraf taraf tasdîk ve ocak ağalarından dahi istiknâh-ı keyfiyyet olundukda, düşmene mukābele eyleyecek derecelerde neferât olmayup, hareketde vukū‘-1 hatar derkâr olduğunu tahkīk eylediler. Sadriaʻzam ise İsmâ‘îl tarafından müşteşʻir olup, orduda ‘askerin fikdânını ve himmet ü gayretin fütûr u noksânını his ile encâm-ı kârı tehayyül ve bir iki bin âdem ile İsma‘îl'e karîb mahalle varup, imdâd u iʻâneyi te'emmül etmekle, baʻzı hayr-hâhân-ı devlet bu tedbîri tahsîn ve dâʻiye-i ‘azîmetini tetmîn edüp, baʻzı sâde-dilân-ı rüzgâr bu re’yi tehcîn ve Dobruca ehâlîsi bî-gayret ve umûr-ı diniyyelerinde lâ’ubâlî bir tâyife-i hâyife olup, dimâğlarına buhâr-ı fesâd dahi mütesâ‘id olmağla, ‘asker-i kalîl ile ‘azîmet ve maʻâzallah sûret-i uhrâ ile ‘avdet olunur ise sedd-i râh mümânaʻat olacağlarından başka: "Sizi yağma ve belki ifnâ eyleyecekleri sübût-yâfte-i rütbe-i ‘ilmü'l-yakīndir" deyü Sadrıaʻazam'ı tevhîş ve müşârun ileyhde olan cübn-i tabîʻi dâʻiye-i şevkini ber-hemzede-i teşvîş edüp, 'azîmetden keff-i yed ve riște-i kelâmı tedbîr-i âhara medd eyledi. Şöyle ki: "Münferiden 'azîmetimiz dahi münasib olmadığı hâlde bir mahzar tertîbine muhtâcsız" dediği gibi cümlesi icâbet ü ıtıbâk ve "Besmele ile temhîr ederiz" [67b] cevabıyla teşmîr-sâk-ı ittifak edüp, minvâl-i muharrer üzere ‘arz u mahzar tertîb ve 'atebe-i gerdûn-kıbaba ref ü tesrîb eylediler. Bundan akdem Rûsiyyelü tarafından Salçu nâm kâfir Ordu-yi hümâyûn'a gelüp, tehvîn-i maslahat-ı muhâdene eder baʻzı kelimât-ı mümevvehe lisânından sâdır ve bu mülâbese ile müstağrak-ı kerem mütekâsir olup, mütehammil olduğu mevâdd-ı zâhir bünyân-ı ‘avâmdan tevriye ve bir müddet mürûrundan sonra serîʻan 'avdet etmek üzere Rûsiyyelü tarafına 'azîmet murâd eylediğine binâ'en, sebîli tahliye olunmuşidi. Devlet'e nâfi' ahbâr ile 'avdeti melhûz iken taʻyîn etdiği müddet münkazî olduğundan fazla, Devlet-i 'aliyye ‘askerinin yevmen-fe-yevmen memleketlerine rücûʻlarını, tareyân-ı za‘fla inkılâb u ıztırâb üzere olduklarını ve sayir ma'lûmât u mesmûʻâtını Rûsiyyelü'ye takrîr eyledikde, ihtilâs-1 vakt-i fursat ve meștâ ‘askeri teheşşüd etmeden maslahatlarını teshîl içün tuhûm-ı İslâmiyye'ye hücûm üzere oldukların o havâlîde bulunan vüzerâ vü ru'esâ tahrîr ü işâret ve Kili Kalʻası'nın mahsûriyyeti dahi şüyû' bulup, sügūr-ı İslâmiyye muztarib ve taraf taraf nîrân-ı hurûb mültehib olduğu Serdâr-ı ekrem'in maʻlûmu oldukda, cân başına sıçrayup, "el-Fursatû temürrü merr's-sehâbi" me’âline vâkıf ve ba‘de-zemân cell-i saʻy u himmetini muhafaza ve imdâd-i etrâfa sârif olup, bundan akdem Tırhala Sancağı tevcîh ve Hazîne-i hümâyûn'dan bir mikdar nakid ile terfîh olunan Karahisârî Ahmed Paşa'nın İsmâ‘îl'e murûru irâde olunup, ‘adem-i imtisâl-i misâl ile merkez-i gavâyete pâ-nihâde olduğuna binâ'en, Kapu Kethûdâsı olan Yeğen İbrâhîm Ağa müşârun ileyhi Kili Kal‘ası imdâdına tahrîk içün taʻyîn ve Deliorman müte‘ayyinlerinden Kıvırcığlı Halil'in tebe‘ât-ı sâbıkası zimnında sâdır olan emr-i kazâ-mazâ terkīn ve beş yüz süvâriyle İsma‘îl'e ve andan Kili'ye ‘azîmeti kâr-güzârân-ı Ordu-yi hümâyûn [68a] taraflarından tahsîn olunup, metbûʻu olan ‘askere tevzî vü taksîm zımnında on beş bin guruş inʻâmıyla bâzû-yı iktidarı tahkîm ve hılâl-i Muharrem'de Mîr-i mîrânlık tevcîhiyle İsakçı muhafazasına meʼmûr olan sabıkā Yeniçeri Ağası Sâlih Paşa rütbe-i vâlâ-yı vezârete tas‘îd ve Tolçi Kasabası'nda emr-i muhafazaya kıyâm eylemesi te’kîd olundu. Ruscuk'dan Bâkīkırı yurduna gelince 'asâkir-i İslâmiyye'nin ânifen zikr ü beyân olunduğu vech üzere, rücûʻları vukūʻ ve Ordu-yi hümâyûn'da bir tarafın mazarratını def edecek derecelerde min-ciheti'l-ceyş kudret olmadığı maʻlûm-ı efrâd-1 cumû' ise dahi, on beşer guruş nakid ve senesi zarfında mevâcibine müstehakk olmak ve dilediği ocakdan yazılmak şartıyla beş yüz nefere karîb piyâde ocağlarından dalkılıç tahrîr olunup, nehren Kili'ye tesyîr olunduğundan fazla, Ordu-yi hümâyûn müteʻayyinleri dâhil-i hayta-i iktidarı olduğu derecelerde süvârî tahrîr ve bahşişlerini edâ ile Sadr-ı rum ʻÂşir Efendi'nin ʻan-asl Kapu-çukadârı kadar olup, bir zemân Burusa Mütesellimliği ile güzârende-i evân ve bu defʻa iki tûğ ihsânıyla fâyiku'l-akrân olan Mahmûd Paşa maʻiyyeti ile savb-ı mezkûra tesyîr olundukdan sonra, Ordu-yi hümâyûn'da verilan Rûzmerre taʻyînât iki günde bir kıtʻa ve serhadlerde olan ʻasâkire defʻ ile vaktin tehammülü ne ise icrâ ve verâ-yı tütuk-ı gaybından ne gûne suver-i garîbe rû-nümâ olacağına dîde-güşâ-yı teslîm ü rızâ oldular.