Safer'in sekizinci gecesi Moskovlu Kili Kalası üzerine gelüp, metânet ü hasânetine nazar ve halîcde olan şalopelerden ihsâs-ı zarar edüp, leylen hücûmu izmâr ve terk-i harb-i nehâr niyyet etmişler idi. Kili pîşgâhında hafr olunan meterisler üzerine cevf-i leylde iki tarafdan sevk-i ‘asker-i haybet-eser eylediklerinde, [66b] kıllet-i cünd-i İslâm'dan nâşî kalaya doğru çekilmek iktizâ edüp, meterislerden tebâʻüd ü tenahhî ve o esnâda düşmen dahi çatup, taraf-ı âhardan hücûm eden hem- cinsini fark edemeyüp, hasm zannıyla muhârebeye tesaddî etmeleriyle birkaç sâʻat miyânlarında mukātele müstemirr ve ehl-i İslâm bu hâle nazar ile merkez-i sebât ü celâdetde müstekarr olup, kal‘adan ve şalopelerden toplara âteş verilüp, kati çok melâʻîn-i matmûre-nişîn-i siccîn olduğu hâlde, isfirâr-ı subh ile kaziyyeye vakıf ve Kili'den bir iki sâʻat girüye mütecânif olarak bir mahalde temekkün ve ittihâz-ı câ-yı tehassun eyledikleri ve bu muhârebede müteʻayyin cenerallerinden biri hâlik ve cânib-i sakara sâlik olduğu haberi İsma‘îl Ser‘askeri tarafından vâsıl ve kulûb-i mü'minînde ferah u sürûr hâsıl oldu.