Çünki Nemçelü ile mevâdd-ı mütâreke münʻakid olup, ahd-i hasmeyn gāyilesi bertaraf ve Moskovlu üzerine fîmâ-ba'd bi'n-nefs Serdar-ı ekrem'in teveccühü matlûb-ı Hudâvend-i bâhirü'ş-şeref olmuşidi. Güzergâh-ı ceyş [65b] ü sipâh olan Fokşan ve havâlîsi Nemçelü tarafında bulunmağla, tarîk-i mesdûd ve hîn-i mütârekede tarafeyn ‘askerinin bulundukları mahalle vaz‘-ı hudûd olunup, cevâz-ı ‘asker husūsu lâ-muhâle Nemçelü ile mukāveleye muhtâc olduğundan, mürâsele ve muhâtaba-i müzakereye ibtidâr olundukda gâh devletleri tarafından istîzân lâzım geldiğini behâne ve gâh teʻaddî-yi hudûd bâʻîs-i infisâh-ı şurût-ı mütâreke olacağını ibbâne ile ilkā-yı dağdağa vü teşvîş ve ezhân-ı ekâbirân-ı devleti tahdîş eylediler. Zevâhir-i ahvâle nazaran Devlet-i 'aliyye tarafından istîzâna ruhsat sebeb-i fevt-i vakt ve şurût-ı mütârekeyi nakz ü ilgā, hasmeyn-i müttefikayn miyânına cünûd-ı İslâmiyye'yi ilkā gibi bir maʻnâ olup, bu mahzûrât îrâdıyla Rusçuğ'a 'avdet-i istihsân ve sunûf-ı ‘askeriyye fevc fevc berü yakaya güzerân oldular. Bir iki günden sonra huzûr-ı Serdar-ı ekremî'de tertîb-i encümen-i meşveret ve ne tarafdan Moskovlu üzerine ‘azîmet münasib olduğu zebân-güzar-ı erkân-ı devlet oldukda, her tâyife hevâlarına muvâfık tedâbîri takrîr ve muavvec ü sekīm kelimât ile maglata vü safsatayı tevfîr velhâsıl istîhâ-yı sevâʻid-i himem-i nâs cihetiyle vakt ü hâle münasib zafer-yâb-ı re’y-i sâyib olamadıklarından Silistre tarafına teveccüh ve Silistre'de bi'l-ittifâk tarîk-i savâb intihâb olacağı tefevvüh olunmağla kable'l-hareke Karahisârî Ahmed Paşa İsakçı'ya ve Maçin Muhafızı Arslan Paşa İbrâ'il'e ve Segbân-başılık'dan nâyil-i vezâret olan Yegen Mehmed Paşa Hırsova muhafazasına me'mûr olduklarından gayri, Mikdâd Paşa'nın vezâreti ibkā vü ive İsmâ‘îl'e 'asker sevk etmek üzere ber-vech-i ta‘cîl tesyîr ve Ordu Çerhacısı Kürd 'Osmân Paşa İsakçı Başbuğu nasb olunup, maʻiyyetine yeniçeriden bin nefer dalkılıç tahrîr ve sevâdd-1 cemʻiyyeti [66a] teksîr olunup, İsmâʻîl Serʻaskeri'ne ve o tarafda bulunan Tatar sultanlarına Ordu-yi hümâyûn hazînesinden küllî 'atâyâ ile iʻâne vü irfâd ve zahîre-i vefîre ile imdâd olundukdan sonra, Ruscuk'dan hareket ü kıyâm ve tayy-i merâhil ile evâyil-i Saferü'l-hayr'da Silistre fezâsına nasb-ı hıyâm olunup, bu hılâlde Topçu-başı Hasan Ağa'nın Beldar Ağası'yla vukū bulan müşâteme vü mücadelesi ve umûr-ı ocağda olan müsâmaha vü müsâhelesi ‘azl ü nefyini îcâb etmekle, merkūm Bozcaada'ya tagrîb ve Nişli Mehmed Ağa mansıb-ı mezkûr ile tatrîb olundu. Şâm Vâlîsi İbrâhîm Paşa'nın tavırlu nidâsesi rızâ-yı hümâyûna münâfî ve ‘an-asl müşârun ileyh bir merd-i câfî olup, kâffe-i harekâ[t]ı şer' ü kānûnun hilâfı olduğundan başka, tesviye-i umûr-ı hüccâc, müdebbir ü kâr-güzâr bir vezîre muhtâc olmağla, kesret-i emvâl ü etbâʻ ile şevâhik-i cibâl-i iştihâra mütesâ‘id olan olan Cezzâr Ahmed Paşa, Eyâlet-i Şâm ile kâm-revâ ve Rakka Eyâleti, selefi müşârun ileyhe ve Eyâlet-i Haleb, Sivas Mübâyaʻacısı iken dest-yârî-yi erbâb-ı miknet ile nâyil-i rifat-ı vezâret olan Turunc-zâde Süleymân Paşa'ya ve Köstendil Sancağı, sadr-ı esbak Yûsuf Paşa'ya ve Vidin, Cezayirli Tüfenkçi-başısı 'Ali Paşa'ya ve Vidin Serʻaskerliği, Kirmân Eyaleti inzımâmıyla Bekmezci Mehmed Paşa'ya tevcîh ü ihsân ve Moralı Silahdâr Ahmed Paşa'ya Babadağı muhafazası emr ü fermân olundu.