Çünki beyne'd-devleteyn mütâreke husûsu nizâm bulup, fîâ-ba‘d murahhasların bir mahalde ictimâʻıyla mevâdd-ı musâlahanın mükâlemesine şürû‘ lâzım gelmişdi. Devlet-i ‘aliyye her ne kadar mesârif-i kesîreye giriftâr olur ise dahi ibkā-yı şân u mekârim-i Saltanat-ı seniyye'yi i‘lân kasdıyla sevâhil-i Tuna'nın berü yakalarında vâki beldelerinde ictimâ‘-1 süferâ bazı müdebbirân-ı sütûde-[a]râ tarafından sevk ü taʻlîm ve Avrupa devletlerinde gûyâ devlet-i gālibe erbâbı maslahat-ı müsâlemeyi memleketlerinde görmek galebe vü kuvvetlerin işâʻa kabîlinden olduğunu tefhîm eyledikde, tedbîr-i dil-pezîri telakkî bi'l-kabûl kılınup, Ziştovi Kasabası mükâkemeye tahsîs ve Ordu-yi hümâyûn'da Re'îsülküttâb olan 'Abdullah Efendi'nin Murahhas-ı Evvel olması mukaddemâ telhîs olunmuş olmağla mûmâ ileyh Murahhas-ı Evvel nasb u taʻyîn ve ulemâ-yı aʻlâm tarafından dahi mütevâzı vü halûk ve mütebassır u şefûk bir zâtın Murahhas-ı Sânî nasb olunması matlûb-ı Şehriyâr-ı bâhirü't-temkîn olmağla sâbıkā Haleb Kadısı ‘İmet Beyefendi'de kābiliyyet ü ehliyyet melhûz olduğuna binâ'en, Mekke-i mükerreme Pâyesi hakkında erzânî ve mükâleme-i mevâdd-ı musâlahaya Murahhas-ı Sânî nasb olunup, [64a] Dürrî Efendi dahi Murahhas-ı Sâlis 'unvânını iktisâb u terfî‘-i şânını mûcib olur baʻzı imtiyâzât ile isticlâb-ı sürûr-ı bî-hisâb eyledi. Âsitâne'de mukīm İngiltere ve Felemenk elçileri tavassut dâʻîyeleriyle mukaddemâ devletleri tarafından meʼmûr ve Ordu-yi hümâyûn'a 'azîmetleri meşhûr olmuşidi. Bu esnâda hıdmet-i tavassuta âhar kimesnelerin me'mûriyyeti tehakkuk eylediğine binâʼen, fesh-i ‘azîmet ve bir nevʻ hacâlete vukū ile mahrûm-ı vesâtet oldular.