Sadriaʻzam ve Serdar-ı ekrem Yergöğü ‘avdetinde birkaç defa riʻâyet-i sünnet-i meşveret ü ittifâk-ı cümle ile Moskovlu üzerine hareket ü ‘azîmete niyyet edüp, hatta İsakçı'ya dek iktizâ eden zehâyir, güzergâh-ı ‘asâkir olan merâhil ü menâzile tertîb ve sû-be-sû kâr-güzâr mübâşirler ba's ü tesrîb olunmuşidi. Giderek nüfûs-1 nâsda Nemçe üzerine şevk-i ‘azîmet peydâ ve muʻâyeneten ve semâ‘en Yergöğü Muhârebesi'nde tavâyif-i ‘askeriyyenin tahkīk eyledikleri nefel ü ganîmet eʻinne-i ihtiyârlerin o tarafa imâle vü isnâ ve Sadrıa zam'ı dahi kurbiyyet-i turûk u mesâfât ve 'umrânı sümût u cihât igrâ edüp, [62b] Ruscuk tarafına teveccühü tercîh ve konakcıları o tarafa sevk ü tesrîh eyledi. "Fe-izâ ‘azemte fe-tevekkel ‘alallâh" medlûlü üzere niyyet ü ‘azîmetinde sebât-ı kalb ve 'adem-i televvün, müstetbi‘-i fevz ü zafer ve fi'l-asl hutûb-ı harbiyyede mûceb-i zarûrî terettüb etmeksizin ‘azîmet-i ûlâyı fesh ü tebdîl, kulûb-ı ‘askeriyyeyi ifsâd u tahvîl ile tekvîn-i mehleke vü hatar edeceği zâhir olunduğundan gayri, Nemçelü'nün Yergöğü'de kuvvet-i batş-ı cünûd-ı İslâmiyye ile müşâhede eyledikleri kesr ü inhizâm denme hâl ile iltiyâm kabûl etmeyüp, nasb-ı Serʻasker ile o tarafın gāyilesi ber-taraf olacağı ‘akla karîb iken gışâve-i sekret-i gaflet-i Sadrıa zam'a perdedâr-ı çeşm-i basîret olup, re’y-i evveli fesh ile ehvâ-yı nâsa tâbi ve bilâhare matmûre-i nedâmete vâki olduğu inşâʼallâhü Teʻâlâ mahallinde tafsîl ü işbâ olunsa gerekdir. Nazm: İzâ erâda'llâhû emran bi’imri'in, Ve kâne zâʻaklin ve re’yin ve basar, Ve hîletin yaʼmelühâ fî külli mâ, Ye’bâ bi-hî cemî’u esbabi'l-kader, Eğrâhü bi'l-cehli ve a’mâ kalbehû, Ve sellehû min-re’yihî selle'ş-şa'r, Hattâ izâ enfeze fî-hi emruhû, Radde aleyhi aklehû liyüğteber. Binâ-berîn sene-i mezkûre Zilkaʻde'sinin dördüncü günü Şumnu sahrâsından fekk-i tınâb-ı hıyâm-ı ârâm ve kat‘-1 merâhil ile Ruscuk fezâsını muhayyem-i ‘asâkir-i İslâm edüp, baʻzı hayr-hâhlar sevk ü ibrâmıyla İsmâ'îl'e bir mikdâr 'asker irsâl ve memerr-i düşmen-i muhtâl olan emâkin ü mehâlik dahi mehmâ yüsâ idühü'l-hâl istihkâm ü takviyesi levâzımı istikmâl olundukdan sonra, livâ-yı şerîf Ruscuk'da tevkīf olunup, ebnâ-yı sipâhyân u silahdârân muhafazasına meʼmûr ve bunlara nâzır vesâyir umûr u husûsun o tarafda ru’yetinde mübâşir olmak üzere Tevkīʻî bulunan Doğramacı-zâde 'Abdullah Efendi müntehab-ı cumhûr olup, meʼmûriyyetini mutazammın yedine teslîm-i menşûr olundukdan sonra, ihzâr olunan merâkib ile sunûf-1 ‘asâkir tertîb-i sâbıkları üzere fevc fevc nehr-i Tuna'yı ‘ubûr ve cümleden [63a] sonra Sadrıaʻzam dahi havâss-1 etbâʻıyla murûr eylediği hînde esfâr-ı sabıkadan kalmış meteris mahallerini tathîr ve müceddeden tabyalar izâfesiyle muʻasker-i hümâyûnun esbâb-ı kuvvetini teksîr edüp, ‘asâkir-i bâkiyenin vürûduna intizar ile sahrâ-yı mezkûrda mazalle-nişîn karâr oldu. Birkaç günden sonra her maslahatın verâsı alınup, hatt u tirhâle dâyir meşveretlere mübâşeret ve havâtır-ı ru’esâ-yı ‘asâkire lâyih olan tedbîrât-ı mevkiʻ redd ü kabûlde tezebzüb eyleyerek menzil-res-i nihâyet ve Ağa Paşa Bükreş'e iki saʻât mesâfede vakiʻ mecma‘-1 a‘dâ üzerine Serʻasker olup, Sadrıaʻzam hazretleri dahi Yergöğü'de olan meterislerde kifâyet mikdârı ‘asker ile ikāmet ve etrâf u eknâfa nezâret ile icrâ-yı maslahat-ı vakt etmek vâdîlerinde cümlesi etbâk ile şedd-i nitâk-ı 'ahd ü mîsâk ve fedâyî ‘askeri mâddesi dahi o esnâda silsile-bend-i ittifak ve gāyeti neye müncerr olduğu maʻlûm-ı dakīka-şinâsân-ı âfâkdır. Bu tertîbât ile iştiğālde iken, nazm: Kâsid nâ-gâh der-in köhne deyr, Gulgule endâht ki, es-sulh hayr mefhûmu üzere Zilhicce'nin altıncı günü Prusya Elçisi Ordu-yi hümâyûn'a gelüp, tafsîli zîrde muharrer olan ittifâk tasdîk-nâmesini ve Rayşenbaş Muʻâhedesi haberini ve ‘akd-i musâlahada sâyirleriyle kendü tavassutunu işʻâr ve fi'l-hâl Re’îsülküttâb Efendi mükâlemeye meʼmûr olup, Nemçelü'nün murahhası Ruscuğ'a ihzâr ve mecâlis-i 'adîde inʻikādından sonra dokuz mâh müddet taʻyîni ile emr-i kke karîn-i istikrâr, vâhid-i hasmeynin biri bu cihetle tefrîk ve cüll-i himmet-i devlet hasm-ı dîgere sarf olunmak râbıtası tevsîk olundu.