Mevacib akabinde taraf-ı Mülûkâne'den teşrîfât irsâli mu‘tâd olduğuna binâʼen, hâlâ Silahdâr-ı Şehriyârî ‘Abdullah Ağa ile kürk ve hançer ve taltîfi mutazammın hatt-ı kerâmet-eser irsâl olunup, Sadrıaʻzam Yergöğü tarafında kalanın ta'mîrine ve askerinin tabya ve tertîbine meşgül ve henüz orduya ‘avd u kufûl etmamiş bulunup, Ağa-yı müşârun ileyhi ricâl-i Bâb-ı ‘alî, kāʻide [61b] üzere istikbâl ü terhîb ve mukaddemce nasb olunan haymeye tenzîl ile lâzıme-i mihmân-nüvâzîyi kemâ-hüve hakkuhû tertîb eylediler. Serdâr-ı ekrem dahi ol havâlinin takviye vü istihkâmını verüp, Ordu-yi hümâyûn'a vürûd ve ferdâsı tertîb olunan Dîvân-ı şâmihu'l-erkân'da Ağa-yı müşârun ileyhin hâmil olduğu hatt-ı hümâyûn kıraʼat olunup, teşrîfât-ı seniyye ile Sadr-ı bülend-kadr nâyil-i ikbâl-i nâ-maʻdûd oldu. Selanik Mutasarrıfı Vezîr Selîm Paşa, Rumeli Sürücülüğü ile Ordu-yi hümâyûn'a me'mûr olup, isnâd olunduğu vech üzere ihrâc-ı ‘asâkirde rehâveti ve seyr ü hareketinde batâ’eti mûceb-i inhitât-ı kadr u menzileti olmağla zamîr-i Sadriaʻzamî'de müstekinn olan gayz-ı kadîm ü hâdisin dahi temâm icrâsı vakti ser-zede-i zuhûr olup, Eski Zağra'ya vürûdunda Kapucu-başı Yeğen İbrâhîm Ağa yetişüp, emvâl ü eşyasını kabz u temhîr ve maʻiyyetinde olan zaʻîmlerin biriyle müşârun ileyhi ber-mantûk-ı mer-i şerîf Limni Cezîresi'ne tesyîr eyledi. Burusa Bileciği sükkânından Himmetoğlu'nun ve Bâzârcık mütemekkinlerinden olup, bir takrîb Kapucu-başı olan Azaklıoğlu'nun cerâyim-i güzeşteleri hasebiyle izâle-i vücûdları lâzım geldiğine binâʼen, Himmetoğlu Ordu-yi hümâyûn'da ve Azaklıoğlu Varna'da i‘dâm olunup, fukarâ vü zuʻâfâ eyâdî-yi gālibe vü tasallutlarından tahlîs olundu. Hasan Efendi-zâde Mehmed Râşid Efendi ki, tafarât-ı nizâmiyye ile iki üç sene zarfında Süvârî Mukābeleciliği mansıbını ihrâz etmişdi. Destyârî-yi müteʻayyinân-ı vakt ile tevsî‘-i dâyire ve celb-i emvâl-i mütekâsire eylediğinden gayri ‘azâyim-i umûr-ı Devlet'e taʻriz ve sadrıaʻzamlara bir takrîb ile temahhuz edüp, ahz u fetke müte‘allik taʻlîmât ile tarîk-i gayr-i müstakīm mücâveze-i hadd ü vazîfeye sâlik ve hod-be-hod kesb-i hatarât u mehâlik edüp, hadâset-i sinn ü sâl ve 'adem-i tecribe-i ahvâl ile erbâb-ı ‘ukūlün nesâyih-i müşfikānesini ‘adem-i kabûl ve ‘âkıbetü' [62a] l-emr bu makūle harekât-ı nâ-magzıyyesi vâkıf-ı serâyir-i nâs olan Şehriyâr-ı ‘adâlet istînâsa inʻikâs etmekle te’dîbi irâde buyurulup, Asitâne'de vârid ve de mâ-meleki zabt olunup, Kıbrıs Cezîresi'ne nefy ü tağrîb ve bu sebeble had-nâ-şinâsân-ı rüzgâr tahvîz ü terhîb olunundu. Bu takrîb ile menâsıb-ı dîvâniyyede ba'zı tasarrufât u tegayyürât lâzım gelüp, Nişancılık, Doğramacı-zâde 'Abdullah Efendi'ye ve Defter Emâneti, Hakkı Mehmed Beyefendi'ye ve Mukābele-i Süvârî, Karahisârî ‘Ömer Bey'e ve Mevkūfât, Kara Hâfız Efendi'ye tevcîh olundu. Muhafaza-i vakt ü zemân ve mübâşeret-i umûr-ı ‘ilmiyyede fikr-i vukū‘-1 taʻrîzât-ı akrân sebebleriyle Asitâne-i saâdet'de halvet-güzînân-ı samt u sükût olan meşâyihü'l-İslâm'ın birer mahalle iclâ olunmaları taraf-ı Fetvâ-penâhî'den ‘arz u inhâ olunup, firkat-i evlâd u akārib sebebi ile zuhûr-ı inziʻâc-1 hevâtir her ne kadar hılâf-meşreb-i Pâdişâh-ı iskender-menâkıb ise dahi taraf-ı hümâyûnlarından verilan istikbâl hasebiyle mümâşât olunup, Dürrî-zâde es-Seyyid Mehmed ‘Ârif Efendi, Kütahya'ya ve andan hacc-1 şerîf'e gitmek ve Müftî-zâde Ahmed Efendi ve Mehmed Kemâl Efendi arpalıkları olan Ankara ve Keşan'a ‘azîmet eylemek üzere me'mûr oldular.