Teceddüd-i nevbet-i Sadâret'de Kethudâlık makām-ı celîlinde bulunanların ekser evkātda 'azl ü tebdîlleri vâkiʻ olduğundan gayri, hâlâ Sadrıaʻzam Kethudâsı Emîn Paşa kayını Çelebi Mustafâ Reşîd Efendi mümtezic ü muhtelit ve rişte-i intisâbı her cânibe mürtebit olup, her mevsimde istihdâmı mümkin ü kābil ve kimin vaktinde bulunsa rızâculuk sûretinde meslek-i sadâkate mâyil olduğu müsellem iken bir zemândan berü inhirâf-ı mizâc ile ser-nihâde-i visâde-i bîmârı ve ferâğ-ı bâl ile tashîh-i mizâc gāyilesi netîce-i efkârı olduğu Sadr-ı ʻâlî-kadr'in maʻlûmu ve ru'yet-i umûr-ı Devlet sıhhat-ı vücûd ve safvet-i fikre menût olduğu meczûmu olmakdan nâşî şehr-i Ramazan'ın on beşinci günü Kethudâlık mesnedinden mûmâ ileyhi ʻazl edüp, baʻzı umûr-ı mühimme tesviyesi ʻunvânıyla Edirne'ye irsâl ve hıdmet-i mezkûre ile Defter Emîni bulunan Feyzullah Efendi'yi makzıyyü'l-âmâl ve Defter Emâneti ile Edirne'de mukīm olan Doğramacı-zâde ʻAbdullah Efendi'yi tefrîh ve Ordu-yi hümâyûn'a gelmesi husûsu tarafına tahrîr ü tasrîh olundu.