Aʻdel-i eyyâm-ı mevâsim olan fasl-1 behâr-ı mütekaddim fîmâ-baʻd Ordu-yi hümâyûn'un sahrâya hurûcu lâzım gelmekle, işbu Şaʻbânü'l-muʻazzam'ın yigirmi beşinci günü Sadrıaʻazam ve bi'l-cümle erkân-ı devlet ve Ocaklu tertîb-i sâbıkları üzere Şumnu sahrâsına çıkup, darb olunan hıyâmda ârâm ve şehr-i Ramazan'ın beşinci günü tavâyif-i ‘askeriyyenin iki kıst mevâcibleri dahi ihsân ü inʻâm ve tedarik-i levâzım-ı seferiyyelerine medâr olur esbâb itmâm olundu. Kuban Hânı tarafına taraf-ı vâzihü'ş-şeref-i Mülûkâne'den kilitlü hazîne ile Kara Hisârî birâderi ‘Ömer Bey Asitâne'den me'mûr kılınmışidi. Şumnu'ya iki saʻât mahallde vâki olup, Hân'ın meştâ-nişîn olduğu Kelefçe kasabasına vâsıl u hâmil olduğu hazîneyi teslîm [58a] ile kûze-i hâfızasına îdâʻ olunan vesâyâyı nâkl ve bir ân akdem İsma‘îl cânibine hareketi matlûb-ı Şehriyâr-ı ‘âdl olduğunu ifâde ve ordudan dahi baʻzı tekâlîfine müsâʻade birle savb-ı maksûduna tesyîr ve hareket-i bi-tayyihî ile ne hâl ise Bâbâdağı'na vüsûl haberini tahrîr eyledi.