Mûmâ ileyhin taraf-ı hümâyûna olan sevâbık-ı hıdemâtı hasebiyle manzûr-ı nigâh-ı rağbet ve Vâlide Sultân-ı ‘aliyyetü'ş-şân hazretlerine Kethudâ nasb olunup, hâtır-ı pîrânesine min-külli'l-vücûh riʻâyet olunur idi. Etrâfda rasad-bîn-i fursat olan ebnâ-yı zemân tezekkür-i sevâlif-i hukūk u ülfet ile cevânib-i erbaʻasını ihâta vü istî‘âb ve fî'l-asl müteʻallikāt-1 erbâb-ı teʻayyün kabûl-i tekessür eyledikce recâ vü emel mütefâvit-i râdde-i nisâb olacağı bî-irtiyâb iken hücûm eden ashâb-ı âmâlin husûl-1 mekāsıdları ardına düşüp, îfâ-yı lâzıme-i mürrüvvete berçîde-dâmen-i gayret ve giderek gāyileyi çoğaldup, muʻârız u müzâhimler dahi îrâs-ı kuvvet ve maʻâyib ü mesâlibini tizkâra müvâzebet ile tedrîcî çâr-tâk-ı iltifatdan sükūtuna [57b] ‘illet ve bu ıztırâb u hayret ile ‘âkıbetü'l-emr esîr-i pester-maraz ve ahz-1 cevher ile terk-i 'arz ya'nî, dağdağa-i ‘âlemden âzâde, nuhûstîn-i menzilet-i ahiret olan lahde pâ-nihâde oldu. Mûmâ ileyh bâbâ-yi ‘âlem ü mürüvveti müsellem hukūka râʻî ve hayrâta sahî vü civân-merd ve şifâ-resân-ı ehl-i derd bir pîr-i ercümend idi. Tecâvezallâhû ‘an seyyi’âtihî ve ce‘alallâhü mesvâhü fî cennâtihî Mehd-i ‘ulyâ hazretlerine ricâl-i Devlet-i 'aliyye'den istikāmet ü sadâkatle mevsûf ve ‘iffet ü diyânetle maʻrûf bir zâtın Kethudâ nasb olunması pîrâmen-güzâr-ı hâtır-ı Şehriyârî olmağla, birkaç senden berü Darb-hâne-i 'Âmire Emâneti'nde ibrîz-i hâlisü'l-ʻayâr mâhiyyeti, mehek-zede-i tecribe vü ihtibâr ve sebîke-i gayr-i magşûşe-i lüceyn haysiyyeti âzmâyiş-i sayrefiyân-ı ‘ukūl ile şâyeste-i tamgā -yi iʻtibâr olan Yûsuf Ağa'nın bu hıdmet-i refîʻaya istihkāk u liyâkatını nezd-i ferd-i Şâhâne'de bedîdâr olmağla işbu Saferü'l-hayr'ın on sekizinci günü karîha-i sabihâ-i Mülûkâne'den müşârun ileyhâ hazretlerine Kethudâ nasb u taʻyîn ve kāmet-i ‘izz ü iftihârı ferve-i semmûr ile tezyîn olundu.