Bu esnâda mesned-i hükûmet-i mağrib-i Aksa’ya Sâ‘id Mevlâ Yezîd bin Mevlâ Muhammed tarafından Muhammed Kāyid nâm sefîr Âsitâne-i sa‘âdet’e vârid olup, hâmil olduğu nâmeyi Divân-ı şâmihü’l-erkân’da takdîm mürseli tarafından irâde vü ta‘lîm olunduğu ifâde vü tefhîm eylediğine binâ’en, işbu şehr-i Rebi‘ü’l-evvel’in yigirmi üçüncü Salı günü Divân-ı ‘âlî tertîb ve sefîr-i merkūm ihzâr u takrîb olunup, Hâkim-i müşârun ileyhin nâmesini huzûr-ı mevâhib-i mahsûr-ı Mülûkâne’ye ‘arz etmekle, mahdûmuna i‘zâz-ı ikāmet liyâkatına bir sevb kākum kürk ilbâs ve bi’l-ma‘iyye vürûd eden rüfekāsının ba‘zısına hil‘atler iksâsıyla cümlesi memnûn-ı lutf-ı bî-kıyâs kılındı. Hâkim-i müşârun ileyh nâmesinde cülûs-ı hümâyûn-ı Meymenet-makrûn’u tebrîk ü es‘âd ve kendüsünün dahi câlis-i serîr-i vilâyet-i Mağrib olduğunu îrâd eylediğinden gayri cihet-i vahdet-i İslâmiyye mülâbesesiyle Devlet-i ‘aliyye-i ebedîyyü'l-karâr'a ihlâs u muhabbeti ber-vech-i etemm ve emedd-i baʻîdden berü miyânede cârî olan i’tilâf u yek-ciheti merâsiminin kemâ-kân icrâsında sâbit kadem olduğu inbâ ve İspanyalu ile derîce-i bâz-ı harb ü vegā olmağla, bu bâbda teveccüh-i derûn-ı istidʻâ ve [57a] bundan akdem vâlidi tarafından fukarâ-yı Harameyn'e mebʻûs olup, el-yevm Hazîne-i ‘Âmire'de ber-vech-i emânet mahfûz olan maʻlûmu'l-mikdâr sabâyik-i zehebin isticlâbıyla tarafından bukʻateyn-i şerîfeyn ehâlîsine irsâl olunmasını tahrîr ü iltimâs etmiş sabâyik-i mezkûre heyet-i mahsûsasıyla irsâli mümteni ve taksîmi müşkil olup, be-her hâl meskûken irsâli lâzım geldiği pederleri merhûma tahrîr ü istimzâc ve haber varıncaya dek müşârun ileyh meslek-i dârü'l-karâra intihâc etmişidi. Çünki hey’et-i asliyyesiyle sabâyik-i mezkûreyi vâris ü cânişîni taleb etmiş, sefîrine teslîm olunması taraf-ı zâhirü'ş-şeref-i Mülükâne'den emr ü fermân olunmağla hifz olunan mahalden ihrâc olunup, kabzına tevkîl olunan merkūma teslîm ve bu mazmûnda nâmesinin cevabı terkīm ve sefîrinin mutayyeben cânib-i garba iʻâdesi șân-ı Devlet-i ‘aliyye'den olmağla, mazhar-ı lutf u rağbet olarak geldiği mahalle ‘azîmet eyledi.