Bi'l-fi'l Anadolu Kadıʻaskeri olan Vâlî Efendi-zâde Mehmed Emîn Efendi müddet-i ʻörfiyyesin itmâm ve işbu Cemâziye'l-ûlâ'nın on altıncı günü mukaddemâ Anadolu pâyesiyle bekâm olan Bey Monlâ-zâde Mustafâ Efendi Sadâret-i Anadolu'yla tahkīk-i makām edüp, Ordu Kadısı Tarakçı-zâde dahi ‘azl ve sâbıkā Mısır Kadısı olup, bu defʻa Mekke pâyesiyle mükerrem olan Sıdkī Mustafâ Efendi mûmâ ileyhin yerine vasl olundu. Sâbıkā Rumeli Kadıʻaskeri ve Nakībüleşrâf olan Dervîş Efendi hulûl-i ecel-i mevʻûduyla fevt olup, münhall olan Nekābet-i eşrâf mansıbı Re’îsü'l-ʻulemâ olan es-Seyyid Yahyâ Tevfik Efendi'ye şehr-i mezkûrun yigirmi yedinci günü tevcîh [50b] olundu ve Recebü'l-ferd'in altıncı günü bahr-ı zafer-i İsmaʻîl'e müsemmâ kalyon kebîr-i deryâya indirilüp, ferdâsı tavâyif-i ‘askeriyyenin bir kıst mevâcibleri ihsân ve Segbân-başı olan şahsın zabt u rabt-ı erâzil-i nâsda ‘aczi nümâyân olduğuna binâ'en, bundan akdem Bâb-ı ‘âlî'de Muhzır olan ‘Ömer Ağa mansıb-ı mezkûr ile şâdân ve bir müddetden sonra Uzun Çarşu harîki zuhûr edüp, vâfir büyût u dekâkîn muhterik ü sûzân ve niçe niçe ashâb-ı sermâye vü servet ân-ı vâhidde muhtâc-ı nân oldu. Fe-sübhânellezi'î ceʻale'l-ganiyye fakīran ve'l-fakīrâ ganiyyen.