Sadrıa‘zam olan Cezayirli Hasan Paşa hummâ-yı muhrike 'illetine uğrayup, gitdikce marazı mümtedd ve renc ü ‘illeti müştedd olup, müdâvât ü mu‘âleceden etibbâ ‘âciz ü mütehayyir ve işbu şehr-i Recebü'ş-şerîf'in on dördüncü Salı gecesi meşreb-i hayâtı mütekeddir olup, dağdağa-i ‘âlemden ferâgat ve pâdâş-ı ‘amelini ru’yet içün ihtiyâr-ı sefer-i âhiret eyledi. Bu haber-i hâyil vesâtat-ı muharremât ile mesâmi‘-i kâr-fermâyân-ı devlete vâsıl olup,: "Acaba sahîh ü vâki‘ mi?" deyerek hezâr vecl ü havf ile kapuda ictimâ‘ ve yek-dîgeri ilerüye sevk ile birkaç dakīka tevakkuf ve nizâ‘dan sonra: "Kimi kan tutmuş" ve kimi: "Hâb ve râhata varmış" deyerek tersân u lerzân na‘şı olan mahalle duhûl ile kazıyyeyi tashîh eyledikleri gibi fi'l-hâl hazînesi temhîr ve Şumnu'da vüzerâdan kimse bulunmayup, Ruscuk'da olan Kāyim-makām-ı esbak Hasan Paşa'ya haber tesyîr ve bu keyfiyyet Âsitâne-i sa‘âdet'e tahrîr olundukdan sonra müteveffâ-yı müşârun ileyhin cemm-i gafîr ile nemâzı edâ olunup, bir müddetden berü hâric-i Şumnu'da Bektâşiyân içün binâsına mübâşeret eylediği tekyede medfûn ve isr-i savletinden zehre-tirâk-1 havf olanlar münbasit ü memnun oldu. Nazm: Eger çâr sâlet-i diger çil hezâr, Ne-mâned kesî der-cihân-ı pâyidar. Müteveffâ-yı müşârun ileyhin evâyil-i hâlinden evâhır-ı hâline karîb zemâna dek [51b] irâde-i hazret-i Hüdâvendigâr-ı sabık ile mecmû‘-ı ahvâli bir cüz'e hasr olunup, kalem-i Fakīr ile şîrâze-bend-i itmâm olan mücelled-i evvelde mevcûd olmağla, her ne kadar muktezayât-ı vakt ü hâl iltizâm olunmuş ise dahi kâffe-i hâlini hâfil olduğundan, mahalline ihâle ile ihtiyâr-ı meslek-i itnâb olundu. İşbu vukūʻât sem‘-i hümâyûna vâsıl olduğu gibi baʻzı müdebbirân-ı devlet sevkiyle Şerîf Hasan Paşa'nın Sadâreti müstekarr olup, te’kîdü'l-hâl Kāyim-makāmlık içün başka hatt-ı şerîf isdâr ve mühr-i hümâyûn yine Çavuş-başı Genc ‘Osmân Ağa vâsıtasıyla Rahova Muhafızı müşârun ileyh Şerîf Hasan Paşa'ya tisyâr olundu. Ağa-yı mûmâ ileyh Şumnu'dan hareket ve Ziştovi havâlîsinde Sadrıaʻzam'a mülâkī olup, teslîm-i emânet ve işbu Şaʻbânü'l-muʻazzam'ın gurresi Cumʻa günü müretteb alay ile müşârun ileyh hazretleri Şumnu'ya sâye-endâz-ı miknet olup, ‘umûm hil‘atleri ilbâsıyla icrâ-yı resm-i devlet eyledi.