Rikâb-ı hümâyûn'da Kethudâ olan İbrâhim Efendi meʼmûr olunduğu hidmetde pâ-ber-câ-yı merkez-i istikrâr iken Ordu-yi hümâyûn tarafından baʻzı hıdmetde istihdâm olunmak zemîninde taleb olunduğu ve bu taleb Süleymân [50a] Efendi vakʻasından sonra vukūʻ bulunduğuna binâ’en, semt-i vesveseye zâhib ve gālibâ baʻzı ehl-i nifâk mûmâ ileyh hakkında tagyîr-i meşârib edüp, cüst-cû-yı çâre vü halâs ve baʻzı mahall-i menîʻa câ-yi menâs ittihâzıyla göç ile Cezayirli pençesinden reh-yâb ve Sürre Emâneti'ne taleb-kâr olarak neşeffî-yi gayza şitâb edüp, Rikâb Kethudâlığı'yla ʻAfîf Mustafâ Efendi tefrîh ve selefi Sürre Emâneti ile cânib-i Hicâz'a tesrîh olundu. Ordu-yi hümâyûn tarafından birbirine mütehâlif zuhûr eden şu'ûnât u agrâz ve nefsâniyyete mehmûl vukūʻât Pepekî Hasan Efendi sevkiyle zuhûr-yâfte-i teʻayyün olduğu zevâhir-i ahvâle nazaran müstebân ve mesned-i Kethudâyî'den ‘azli ve mizâc-ı devleti bilür bir zâtın o mesnede takrîbi müstasveb-i hayr-hâhân olmağla, bâ-irâde-i hümâyûn fî'l-hâl mûmâ ileyh maʻzûl ve Reşîd Mustafâ Efendi yerine mevsûl oldu.