Vezîriaʻzam Cezayirli Hasan Paşa zamîr-i aʻdâyı istikșâf kasdıyla İsmaʻîl'de iken Kapucu-başı el-Hâc Bekir Ağa'yı Rûsiyye Feld Mereșâli tarafına irsâl ve bir müddet mürûrundan sonra Bârûc nâm bir kâfir öte tarafdan gelüp, islâh-ı zâtü'l-beyne mu'allak îrâd-1 makāl etmekle fî'l-hâl Ordu-yi hümâyûn'da bulunan erkân-ı Devlet bir yere gelüp, vakte nazaran, "es-Sulhü hayrün" mefhûmuyla ‘ameli tasvîb ve bu keyfiyyetini ifâde içün müteʻayyinân-ı devletden bir iki zâtın Dergâh-ı vâlâ'ya tesrîb olunmasını tertîb eylediklerine binâ’en, Defter Emîni ve Büyük Rûz-nâmeci olan ‘Ali Ra'îk Efendi ve Hasan Efendi bu hıdmetin ru'yetine tahsîs olunmuşlar idi. Mûmâ ileyhimâ Âsitâne-i saʻâdet'e vârid ve bu maddeler içün huzûr-ı hümâyûnda meclis-i hatîr münʻakid olup, taraf taraf huzzâr-ı meclis ‘arz-ı re’y ü tedbîr ve sû-be-sû takrîr-i mâ-fî'z-zamîr etmeleriyle encâm-ı kâr düşmen ile muhârebe olunup, bâ-fazl-ı Bârî fevz ü zafer-yârî oldukda, sûret-i galebede sulh ihtiyâr olunsun kelâmıyla, meclise hitâm verilüp, mûmâ ileyhimâ bu vechile ircâ ve geldikleri câya isrâʻ olundular.