Sadrıaʻzam ve Serdar-ı ekrem'e eslâfından ziyâde istiklâl verilüp, kâffe-i umûr-ı mülkiyye ve mâliyye ve memâlik-i mahrûsenin zabt u rabtı zât-ı âsafânelerine tefvîz u ihâle buyurulduğuna dâir olan Hatt-ı hümâyûn-ı şevket-makrûn ordu-yı hümâyûna vürûdunda resm-i taʻzîm ile kırâ'at ve iʻlân olundukda, bu gûne lutf-ı bî-pâyân-ı Padişâhî mûcib-i izdiyâd-ı şevk u nûr-ı bâsıra-i dîn ü devlet olup, müşârun ileyh dahi bu şükrâne-i niʻmet-i uzmâya mukābil her bir maslahatda rızâ-yı hümâyûnu tahsîl ve memâlik-i mahrûseye nizâm-ı kâmil vermek sevdâsıyla iktifâ-yı dâmen-i saʻy ü gayret eyledi. tezâyüd-i istiklâl iltimâsıyla sâyir mevâdd-ı hafiyyeyi gûze-i hâfızasına îdâ ve nakd ü mâlikâne ile mutayyeben ircâʻ ve Cere-zâde'ye Anadolu istiksâr olunduğuna binâʻen, Sofya tarafına 'azîmet üzere olan Dâmâd es-Seyyid Ahmed Paşa'ya tevcîhi irâde olunmağla, işbu şehr-i Rebîʻulâhır evâyilinde Kapu Kethudâsı'na ilbâs-ı hiʻlât ve selefine baʻzı mevâʻîd ile i‘tâ-yı tesliyet olundu. Ve Donanma-yi hümâyûn'un vaktiyle Karadeniz'e ihracı ve sefâyinin teksîri ve ‘askerisinin râbıta-i nizamları müdîr ü müdebbir bir vezîrin Kapudanlığ'a tahsîsi, ahvâl-i deryaya vukūfları hasebiyle o tarafdan tedbîr olunmak husūsu mukaddemâ taraf-1 Âsafâne'lerine hitâben sâdır olan hatt-ı hümâyûnda musarrah olduğuna binâ'en, derhal Kapudan Paşa'yı ‘azl edüp [mısra]: Herkesî-râ rû-yi [47a] der taʻmîr-i divâr-ı hodest mefhûmu üzere Vidin Ser‘askeri sadr-ı esbak Yûsuf Paşa'yı Kapudan edüp, orduda olan Kapu Kethudâsı'na ilbâs-ı hilʻat ve tarafına dahi mahsûs tahrîr ü işâret eylediği haberi sem‘-i hümâyûna vâsıl oldukda, el-hâletü hâzihî Vidin cânibinde nâm-âver bir vezîrin vücûdu lâzım ve müşârun ileyhden gayri, o havâlîde idâre-i umûr-ı Serʻaskerî eder vezîr münʻadim olduğundan gayri, Vidin'e haber varup, bu taraflara müşârun ileyh vürûd edinceye dek mevsim-i deryâ hulûl edüp, "Vaktiyle tertîbât-ı bahriyye görülmeyeceği zâhirdir" deyü ibtâl-i re'y olunup, Kapudanlık kemâ-kân Hüseyin Paşa'da istikrar buldu. Sultân Mehmed-i Râbi devrinde Melek Ahmed Paşa ve Murâd Paşa Sadâret'den ba'de'l-infisâl Kapudan oldukları emr-i mesbûk ise dahi sinîn-i mütetâvileden berü misli müşâhede olunmayan mâddeyi fiʻle çıkarmak gāyilesine düşmek zevâl-i vakʻ ü nüfûza mü'eddî olacağı umûr-ı zarûriyyeden olduğundan gayri, müşârun ileyhi Kapudânlığ'a sevkden garaz ne olduğu ednâ-yı te'emmül ile maʻlûm olan kazâyâdandır. Hükemânın: "Evvelü'l-fikri âhirü'l-‘ameli" dedikleri bu keyfiyyetere mebnîdir.