İbrâ’îl kal‘ası ehâlîsi evlâd u ‘iyâllerini karşu tarafa imrâr ve kendülerine ‘avdet ile emr-i muhafazada cân-sipâr olacağlarını muhafızları Mahmûd Paşa'ya iş‘âr ve hattâ bir mikdârı karşu tarafa güzâr eylediğini müşârun ileyh ihbâr edüp, mürûr eden ehâlîsinden başka bu defʻa istîzân üzere olan nâsa ruhsat verildiği hâlde ‘avdet [44b] edecekleri mevhûm ve bu sûretde ‘icâleten İbrâ’îl'e ‘asker îsâli emr-i mahtûm olduğun ifâde etmişidi. Aydoslu Mehmed Paşa Balkan'ın iki tarafından 'asker ihracına mukaddemâ me'mûr olunmağla, Babadağı ve İsmâ'îl ve Bender taraflarına sevk edeceği 'askerden fazla İbrâ’îl tarafına dahi kadr-ı kifâye ‘asker sevk eylemesi içün ısdâr-ı menşûr ve Kapu Kethudâsı bi'l-fiʻl Sipâhlar Ağası olan Berber Mustafâ Ağa ve bi'l-fi'l Cebeci-başı olan Kapucu-başı İsmâʻîl Ağa me'mûr olup hemân me'mûr oldukları gün tahrîk-i rikâb ve semt-i maksûda ‘azm u şitâb eylediler. İbrâ'îl Kalʻası'ndan tareyân-ı havf ile tebdîl-i mekân eden o makūle bed-dil ü cebân tâyifenin i‘âdelerine ve sûret-i imtinâʻu ibâ irâ'e edenlerin nân-pâreleri âhara verileceği tahvîfâtı îkā olunmak üzere tehdîdi mutazammın Silistre ve Hırsova vesâyir mahallerin hükkâm u zâbitânına neşr-i ahkâm olundu. Çernes Muhâfızı iken bilâ-mûcib mahall-i merkūmu terk ile Fethülislam cânibini ihtiyâr eden Vezîr Bekmezci Mehmed Paşa'nın maʻiyyetinde müstevfî ‘asâkir ve mühimmât var iken adayı muhasara üzere olan Nemçelü'nün bir mikdâr katanası görüldüğü gibi bî-ceng ü gavgā zikr olunan palankayı ihlâ ve Vidin tarafına sevk-i matâyâ eylediği ve Sırp reʻâyâsı Nemçelü ile mahlûtan Niş dağlarından fürce-yab ve Vidin taraflarına gelmek şâyi'alarıyla ehâlî-yi Vidin giriftâr-ı hılâb-ı ıztırâb olup, Vidin reʻâyâsının dahi dimâğına buhâr-ı ‘isyân u muhalefet su‘ûd edüp, ‘asker ve mühimmât ile havâlî-yi mezkûrenin istihkâmına sarf-ı nîrû-yı ihtimâm olunmak Vidin Serʻaskeri [45a] Sadr-ı sâbık Yûsuf Paşa tarafından tahrîr olunmuş olduğundan, Vidin etrâfından ‘asker ihrâcı içün mukaddemâ meʼmûr olan Kapucu-başı Ahmed Ağa'dan mâʻadâ Silâhdâr Ağası olan dîger Mehmed Ağa dahi te’kîden lil-hâl taʻyîn ü irsâl olundu.