Hükümrân-ı memâlik-i Fas olan [39b] Mevlâ Muhammed bin Mevlâ İsmâ‘îl'in öteden berü bu Hânedân-ı şâmihu'l-erkân'a râbıtâ-i husûsiyyet ü temahhuzu müstahkem ü mevsûk ve birer vesîle vukūʻuyla her bâr safvet-i derûnunu izhâra talebkâr olduğu mücerreb ü mesbûk olduğuna binâʼen, bu defa mazhar-ı ni‘met-i fekk ü tahlîsi olduğu beş yüz otuz altı ehl-i İslâm esîrlerini mukaddemâ giriftâr-1 dest-i düşmen olan Ahmed Kapudan ile derbâr-ı ‘atûfet-medâra 'arz u takdîm ve hengâm-1 cihâd u gazâ olmak takrîbi ile lüzûmu melhûz olan dört kıtʻa fırkateyn hediyyesiyle lâzıme-i ittihad u yek-ciheti bî-tetmîm edüp, süfün-i mezkûre mersâ-yı Tersâne-i 'âmire'ye rabt olunup, zahmet-keșân-ı maraz-ı isâr olan ehl-i tevhîd ü îmân dârû-yı bür'ü's-sârʻa-i merhamet-i Şâhâne ile def-i iztırâr u hafakān edüp, şerbet-i dînâr ile her biri şifâ-yâb-ı renc-i firûtenî vü mezellet ve hubbu'z-zeheb-i ‘âtıfet ile cümlesi nâyil-i sıhhat-i gınâ vü servet oldular. Hediyye-i mezkûre ile vürûd eden Muhammed Mekkî nâm sefîr nezd-i Hâkim-i müşârun ileyhde merʻiyyü'l-hâtır olduğu mütevâtir olmağla, ricâl-i devlet taraflarından da‘vet ile tarh-1 encümen-i istînâs ü ülfet ve baʻzan hediyye i'tâsıyla merkūm hakkında icrâ-yı lâzıme-i mürüvvet kılındı.