Serdar-ı ekrem hazretleri İbrâ'il'e 'avdet esnasında Eflak ve Yergöğü taraflarının istihkâmına çâre-cûy olup, ne hâl ise bir mikdâr ‘asker ile Kemânkeş Mustafa Paşa ve Kuğu-oğlu ve Depedelenli-zâde'yi taʻyîn ü irsâl ve nefs-i İbrâ'il'e dahi hulûl-ı behara dek ikāmetleri şart olunarak, baʻzı miyâneler idhâl ve piyâde ‘askerinden dahi bir mikdâr dalkılıç tahrîr ü izâfe ile fi'l-cümle def‘-i ‘ârıza-i mehâfe olunmuşidi. Süvârî ‘askeri Maçin tarafına ‘ubûr isticâzesiyle ta‘cîzden hâlî olmayup, gâh terhîb ve gâh tehvîf sûretiyle her ne kadar tevkīf olundular ise dahi fîmâ-ba'd tevakkuf etmeyecekleri zâhir ü hüveydâ ve zecr ü ‘unf ile ikāmetleri istihsâline yârâ-yı kudret mefkūd olduğundan, ihtiyâr-ı cebr ile irtikâb-ı fezâhat eyleyecekleri zihne mütebâdir olmağla, iğmaz u tecâhüle zarûret ilcâ ve ‘asker dahi bu kazıyyeye muttali' olduğundan, hemân açıklara süvâr ile Maçin sahrâsını me’vâ eylediler. Tebâyi‘-i sârika ve nüfûs-ı mâyile olmak mülâbesesiyle İbrâ'îl muhafazasına taʻyîn olununan dalkılıç neferâtı mürûr-ı nâsı ihsâs edüp, yedlerinde olan memhûrları terk ü 'ubûr eden [38b] süvârîye iltihâk ve bu keyfiyyet İbrâ'îl muhafazasında olanlara dahi te'sîr edüp, tahliye-i kal'ada ittifak etdiler. Terk-i kalʻa edenler ancak evlâd-ı ‘iyâlleriyle karşu geçüp, emval ü emlâklarından fâriğ olurlar ise muhafaza-i kal‘aya ‘asker bulunur şâyi'aları îkā ve fi'l-hâl merkūmlara nedâmet ‘ârız olup, kemâ-kân emr-i muhafazada icmâ eyleyeceklerini Ağa Paşa vâsıtasıyla ismâʻ etmeleriyle mehmâ-emken kalʻanın levâzımı görüldükden sonra Serdâr-ı ekrem hazretleri Maçin tarafına güzâr u șitâb ve Asitâne tarafından vürûd edecek habere intizâr ile bîmâr-ı pester-hayret ü ıztırâb olup, birkaç günden sonra taraf-ı vâzıhu'ş-şeref-i Şâhâne'den muktezâ-yı vakt ü hâl iltizâm olunarak, tesliyet-nâme-i hümâyûn vürûdu Serdar-ı ekrem vesâyirlerinin mûceb-i sıhhat-i vücûdu olup, hemân İbrâ'îl tarafının bekāyâ-yı istihkâmı cünûd u nükūd ile ikmâl ü tetmîm ve Maçin muhafazası Cere-zâde'ye ve İsakçı muhafazası Çerhacı ʻAbdî Paşa'ya ihâle ile mâlzemeleri tanzîm olunup, meştâ husūsu dahi Âsitâne'de ehâlî-yi ordunun re'ylerine ihâle olunmuş olduğundan kerrât ile müşâvere olunup, Şumnu kasabası meştâ ta'yînine çesbân görülmekle işbu Muharremü'l-haram'ın yigirmi sekizinci günü Maçin'den hareket mukarrer ve Safer'in sekizinci günü Şumnu sahrâsı muhayyem-i leşker oldu.