Nehr-i Buza kenarında levâzımât-ı istihkâm itmâm olunduktan sonra râyici ile iştirâ olunan zehâyiri girüden îsâle ikdâm u inşâ olununa cisri aʻdâ-yı li’âmdan muhâfazaya ihtimâm eylemek üzere İbrâ’îl Muhâfızı Vezîr Mahmûd Paşa'nın me’mûriyyeti savâb-dîd-i hıred-i meydân-ı eyyâm olmağla derhâl müşârûn ileyh ihzâr olunup, hıdmet-i mezkûre muhavvel-i ʻuhde-i iktidârî kılındı. Mâh-ı mezkûrun yigirmi altıncı Pençşenbih günü ʻasâkir-i mansûre nehr-i mezkûru geçüp, kenâr-ı nehirde vâkiʻ Dubiçe sahrâsını cây-gâh-ı âsâyiş ü ârâm ve ferdâsı nehr-i Remlik etrâfı muhayyem-i leşker-i İslâm olup, merhaleteyn-i mezkûreteynde kāide-i hazm u ihtiyâta riʻâyet ve meterisler hafriyle Ordu-yi [33b] hümâyûn'a metânet verildi. Mahall-i mezkûr Fokşan'a karîb olduğundan istiknâh-ı hâl-i düşmen zımnında Çerhacı ʻAbdî Paşa ve Kuğu-zâde Süleymân Paşa ve Kürd ʻOsmân Paşa me’mûr-ı maʻiyyetleri olan ʻasâkir ile Fokşan'a taʻyîn olunup, kasabaya karîb mahalle geldiklerinde beş yüz kadar melâʻîn karağol şeklinde der-kemîn bulunup, tarafeyn yek dîgeri fark eyledikleri hinde muharebeye mübâşeret ve vâfir kelle vü dîl ile mübârizân-ı İslam ʻavdet ve yevm-i mezkûrda sehâb-ı mâtır-ı âsumân basît-i gabrâyı numûne-nümâ-yı eyyâm-ı tûfân edüp, bârgâh u bengâh-ı gavta-hûr-ı deryâçe-i zemîn ve gürûh-ı ârz-ı mevc-endâz-ı yesâr ü yemîn olup, nehr-i Remlik dahi ʻan-asl cü’z-i bârân ile tuğyân etmesi mücerreb olduğundan derhâl iki rümh mikdârı ʻumk peydâ ve Çerhacı berü tarafa geçemeyüp, Fokşan'da vukūʻ bulan keyfiyyeti suyun öte tarafından savt-ı bülend ile takrir ü inhâ eyledi.