Çünki İbrâ’il tarafına mürûr hülâsa-i re’y-i erbâb-ı şuʻûr olmuşidi. İşbu Zilhiccetü'ş-şerîfe'nin beşinci Pençşenbih günü fevc fevc ʻasâkir-i İslâmiyye karşu taraflara açıklar ile geçmeğe mübâşeret ve ʻaskerin verâsı alındıktan sonra İsma‘îl muhâfazasında olup, bu defʻa Ordu-yi hümâyûn'a daʻvet olunan Cere-zâde Ahmed Paşa'ya Livâ-yı şerîf Kāyim-makāmlığı içün ilbâs-ı hilʻat olunup, Serdâr-ı ekrem dahi şehr-i mezkûrun sekizinci günü zevrak-süvârî-yi ikbâl ve İbrâ’il muhâzâtında vâkiʻ Kral Depesi'nde nasb olunan otağ-ı süreyyâ-nitâka pâ-nihâde-i iclâl olunduğu hînde Mîr-i mîrân'dan olup, Fokşan vakʻasında bulunan Kürd Osmân Paşa'ya sol kol Kuğu zâde Süleymân Ağa'ya Mîr-i mîrânlık ile sağ kol sergerdeliği tevcîh ve ‘Osmân Paşa'nın fakr-ı hâli olmak takrîbiyle, bir mikdâr ʻatıyye verilüp, fi'l-cümle hâli terfîh olundu. Zilhicce'nin yigirmi birinci günü İbrâ’îl sahrâsından nehzat ve nehr-i Buza kenarında vâkiʻ Lanka sahrâsına rekz-i ʻalem-i ikāmet ve bu âna dek [33a] düşmenler ne mahallerde der-kemîn-i fursat oldukları tashîh olunamadığından, ilerüde ve yemîn ü yesârda vâkiʻ olan ru’esâ-yı ʻaskeriyyeye isticlâb-ı hâl ve tahkīk-i mahâll-i aʻdâ-yı bed-me’âl zımnında mukaddemâ tahrîrât irsâl olunmuş olmağla, Kemânkeş Mustafâ Paşa tarafından iki dîl gönderilüp istintâk olundukda, Fokşan'da Nemçe ve Perlat kasabasında Moskov ʻaskeri olduğunu ihbâr ve etrâf-ı sâyireden gelan ihbâr dahi bu hâdise mülâyim olmağla, hemân yevm-i mezkûrun ferdâsı nehr-i Buzo üzerine cisr inşâ olunup, tarafeynine tabyalar ile istihkâm verildikden sonra ʻaskerî tâyifesine hitâben nasîhati müştemill-i şeref-rîz-i sudûr olan vesâyâ-yı hümâyûn ʻalâ-mele’i'n nâs kırâ’at ve sagīr ü kebîre mûcib-i rikkat-i kalb, ve bâʻis-i heyecân-ı ʻarak-ı hamiyyet olup, sünnet-i seniyye-i emr-i beyʻat ya‘nî tahlif-i ʻaskerî husûsuna dahi temşiyet verilüp, aʻdâ üzerine ne mahalden hareket olunmak evlâ olduğu der-miyân ve nehr-i Buza'dan ʻubûr ile Fokşan tarafına teveccühü bi'l-cümle erkân-ı divân istihsân ve cümlesi bu ʻazimet ü niyyete fâtiha-hân oldular.