Silistre sahrâsından mevkib-i hümâyûnun hareketi bundan akdem karâr-gîr-i ehl-i tedbîr olduğuna binâ’en, Zilkadetü'ş-şerîfe'nin on altıncı günü Silistre sahrasından tınâb-ı ikamet ve ârâm-ı tefkîk olunup, yevm-i hareketin dokuzuncu günü Maçin sahrâsı madrab-ı hıyâm-ı cünûd-ı İslâm olup, bir iki gün mürûrundan sonra tertîb-i encümen-i meşveret ve Taraf-ı hümâyûn'dan mehabet-rîz-i südûr olan hatt-ı şerîf kıra’ât olunup, serhadlerin takviyesi ve Serdâr-ı ekrem'in Tuna'yı mürûr ile ya bi'n-nefs mukābele-i aʻdâya müteveccih olması yâhûd Serʻasker taʻyîn eylemesi irâdeleri yegân yegân ehl-i meşverete ifâde olundukda İbrâ’il tarafından celb ile meclise idhâl olunan ihtiyârlar baʻzı fevâyid-i hafiyyelerin istihsâl içün İbrâ’îl tarafına mürûr olunmasını sevk ü tergīb vesâyir ehl-i şûrâ dahi suret-i mümâşâtda re’y-i mezkûru tasvîb edüp, inşâ-yı cisre zemân müsâʻid olmadığından hemân açıklar ile karşu tarafa güzâr olunmak üzere karâr verilüp, Livâ-i şerîf Maçin'de tevkīf ve küttâb-ı aklâm vesâyir rükûb u nüzûle muktedir olmayan ashâb-ı ʻilel ü eskāmın terkiyle Ordu-yi hümâyûn tahfîf ve Tevkīʻi bulunan Doğramacı-zâde ‘Abdullah Efendi bu cümlenin üzerine nâzır nasb olunup, sâmiʻa-i dirâyeti vesâyâ-yı lâzıme ile teşnîf kılındı. İsma‘îl Serʻaskeri olan Vezîr Cezâyirli Hasan Paşa, Hân Tepesi'nde [32b] müctemiʻ olan aʻdâ üzerine hareket ile ibrâz-ı me’âsir-i merdânegî vü celâdet etmek ve selefi Vezîr Küçük ʻAbdî Paşa'nın fîmâ-baʻd o havâlîde ikāmeti gayr-i münâsib olup, Ordu-yi hümâyûn Çerhacılığı dahi müşârûn ileyhe tefvîz olunmak musammem olup, hemân İsma‘îl'den seyr-i serîʻ ile hareket ve Ordu-yi hümâyûn'a gelüp, edâ-yı hıdmet eylemek ve Eflak Bey'i dahi Fokşan'da mevcûd olan aʻdâ üzerine gidüp, o havâlîde olan paşalar ile bi'l-müşâvere âheng-i ceng eylemek irâ’e-i sâyibesi dahi o meclisde müstekarr olup, taraf taraf neşr-i evâmir ve istîsâl-i düşmen-i dîne sevk-i ketâyib ü ʻasâkir kılındı.