Yaş cânibinde halka-bend-i küfr ü dalâlet olan aʻdânın tedmîr ü istîsâline meʻmûr olan Kemânkeş Mustafâ Paşa'ya Rumeli Beylerbeyliği pâyesiyle başbuğluk hilʻati huzûr-ı Sadru's-sudûr'da ilbâs olunup, âmâde kılınan ‘udde vü ‘atâd ve meʻmûr-ı maʻiyyeti olan ecnâd ile bir ân akdem Yergöğü tarafına mürûr eylemesi irâde olunduğuna binâ’en işbu Şevvâlü'l-mükerrem'in ikinci günü Paşa-yı mûmâ ileyh leşker-i bî-şümâr ile karşu tarafa güzâr edüp, bâ-tayy-i merâhil Boğdan ile Eflak beynini fâsıl olan Fokşan'a vâsıl olmuşidi. Keyfiyyet-i mezkûreye Moskovlu muttaliʻ olup, yedi bin kadar piyâde ve süvârî üzerine "Suvarof" nâm cenerali baş nasb edüp, mesfûr dahi nehr-i Siret'i hufyeten mürûr ve Fokşan'a karîb bir mahalli cây-gâh-ı ʻasker-i makhûr eylediği esnâda o havâlîde der-kemîn-i fursat olan Nemçe ʻaskeriyle muhâbere ve iki tarafdan hücûm zımnında müşâvere eylediklerine binâ’en Moskovlu Tikveş tarafından ve Nemçelü Açet tarafından hareket ile tertîb-i masûbe-i hadî‘at eylediklerine Kemânkeş Mustafâ Paşa ʻadem-i vukūf ile Yaş üzerine hareketin tarîk-i suhûletini cüst-cûda iken Şevvâl'in sekizinci günü istıtlâ‘-i ahvâl-i a‘dâ zımnında ilerüye tesyîr eylediği ʻasker-i endek-şümâr-ı İslâm üzerine aʻdânın süvârîsi bağteten hücûm edüp, muhârebe-i cüzʼiyye ʻakabinde vakt-i şâm erişüp, zulmet-i leyl fâsıl-ı mâbeyn-i hakk u bâtıl olmağla düşmen-i mekkâr ihfâ-yı ʻaded ü mikdâr kasdıyla verâsında olan mîşe-zârı câ-yı karâr eylediği ihbârı Paşa-yı mûmâ ileyhin maʻlûmu oldukda aʻdânın bağteten zuhûru her ne kadar ve hem-endâz-ı havâtır olduysa dahi maʻiyyetinde olan Mîr-i mîrân vesâyir ru’esâ-yı ʻasâkiri cemʻ edüp, baʻde'l-meşvere istihkâmâta dâyir baʻzı tedâbîre şürûʻ olunup, fi'l-cümle muhâbereye [28a] istiʻdâd tahsîl etmişidi. Verâdan zuhûr edecek aʻdâyı fikr etmeyüp, "Düşmen-i mücerred kıbâle-i İslam'dadır" cezmiyle mîşe-zârdan ʻale's-seher hurûc ve Fokşan'a vülûc üzere olan Moskov ʻaskerini istikbâl ve işgāl-i nâyire-i harb ü cidâl eyler iken meydân-ı muhârebenin cânib-i yesârından Nemçe ʻaskeri dahi ʻale'l-gafle zuhûr eylediğine binâ’en vekāyîʻ-i şedâyid-i harbiyyeden bî-haber ve sabr u sebât müstelzim-i feth ü zafer olduğunu fehm etmeyen bir fırka-i haybet-eser, firâr ʻani'z-zahf kebîresini irtikâb ve İbrâ’il tarafına şitâb vesâyir-i İslâm'a dahi ʻillet sirâyet-i târî olup, Bükreş vesâyir mahallere müteferrik olduklarından gayri piyâdelerin baʻzısı yaʻnî kazıyyeye mukaddemce vâkıf olanlar bilâ-muhâbere reh-neverd-i vâdî-yi selâmet ve bâkīsi Fokşan'da olan baʻzı emâkin-i hasîneye tehassun ile revâc-dâde-i bâzâr-ı husûmet ve baʻzısı nâyil-i niʻmet-i şehâdet ve baʻzısı giriftâr-ı eyâdî-yi düşmen-i bed-tıynet oldukları peyâm-ı muvahhişi Ordu-yi hümâyûn'a vârid ve ʻısâbe-i muvahhidîne hüzn ü endûh ʻâyîd olup, ne hâl ise Kemânkeş Mustafa Paşa'ya ve maʻiyyetinde olup, başbuğluğunu ʻadem-i tehammül ile icrâ-yı garâz u nefsâniyyet eden paşalara vesâyire istimâlet verilmesi lâzıme-i hâlden olmağla karîbü'l-ʻahdde Ordu-yi hümâyûn'a vürûd eden süvârî ʻaskerinden üç bin kadar süvârî ifrâz ve taraflarına îsâl ve bulundukları mahalde müstekarr olup, müteferrik olan ʻaskeri cemʻ ve istiʻdâd husûlünden sonra yine aʻdâ üzerine varup, ahz-ı intikām ve telâfî-yi mâ-fâta dikkat ile rızâ-yı Hakk'ı istihsâl eylemeleri bâbında ısdâr-ı misâlü'l-imtisâl kılındı.