Bender ve İsmaʻîl taraflarında emr-i mücâveze vü muhâfazaya kıyâm üzerine olan Baht Girây Hân tarafına cânib-i muʻallâ-menâkıb-ı hazret-i Şehriyârî'den ihsân olunan teşrîfât-ı seniyye ve ʻatâyâ-yı behiyye meserret-bahş-ı vüsûl olup, derhâl mevcûd-ı maʻiyyeti olan ʻasâkirin bir mikdârını ifrâz ve Bender muhâfazasına irsâl ʻakabinde râyet-i ʻazîmetin ihtizâz verüp, İsmaʻîl'e karîb Debbâğ Köprüsü nâm mahalle darb-ı hıyâm ve üç bin kadar ʻasker-i İslâm taʻyîni ile Kişinev taraflarını tecessüs ü tefahhusa ihtimâm edüp, o aralıkda yüz kadar Kazak atlusuna musâdefe ve âgāz-ı muhârebe ü muvâkafa etmeleriyle tarafatü'l-‘aynda zikr olunan kefere süyûf-i bererah ile mekân-ı mevrûsları olan hâviyede mücâvir-i dalâlet-i pîşe-gân-ı fecerah olup, mahâzîl-i meşrıkayndan bir fırka-i hezîmet-eser dahi meşhûd-ı guzât-ı mevʻûdü'z-zafer olmağla, derhâl üzerlerine hücûm ile tertîb-i bezm-i sitîz ü hısâm ve idâre-i ke’s-i hammâm ve ekserisini medhûş-ı zehr-âbe-i sinân-ı cân-sitân ve üç nefer zâbitleriyle bakıyyetü's-süyûfunu mukayyed-i silsile-i hizy ü hizlân eyledikleri peyâmı Ordu-yi hümâyûn'a meserret-resân oldukda, Serdâr-ı ekrem hazretleri, Nazm: Bedâ bi-devâ'in müsri'un fî şifâ'ihi, Derâhimün beydun li'l-cürûhi merâhimün. mefhûmunu icrâ ile zahm-dârân-ı İslâm'a ʻatiyye ve Hân-ı müşârun ileyhe hediyye olmak üzere bir mikdâr nakid irsâl ve kemâl-i tahsîni mutazammın tahrîrât-ı seniyye ile neberd-i azmâyân-ı meydân-ı şecâʻati mutayyebü'l-bâl eylediler.