Kalas vakʻasında giriftâr-ı [25a] kayd-ı isâr olan ehl-i İslâm'ı Moskovlu, Leh memleketi derûnundan imrâr kaydına düşüp, Lehlü dahi Moskovlu'yu memleketlerine uğratmamak fikriyle sûret-i mümâ[naʻ]at izhâr ve ʻan-asl tarîk, iki semte münhasır olup, Leh memleketinden mürûr mümkin olmadığı hâlde, Bender'e karîb olan tarîkden geçmeğe mecbûriyyetleri bedîdâr olup, ancak bu kazıyyeye şâyed Bender'de mütehaşşid olan ehl-i İslâm tahsîl-i vukūf ile üserâyı tahlîs ederler evhâmı cây-gîr-i zamîr-i habâset-tahmîrleri olmağla, Bender'de olan ʻaskeri işgāl kasdıyla tarh-ı mansûbe-i mekr ü âl yaʻnî Bender'in bir muhâlif tarafından dört beş bin kadar süvârî irâ’et ü gāret kasdıyla gelmiş tarzında lâf-zen-i meydân-ı müsâdemet ve ʻasker-i İslâm, dahi derhâl mukābeleye mübâderet esnâsında temâmca garaz-ı işgāl istihsâl olunup, üserâ-yı İslâmiyye'yi diyâr-ı nekbet-medârlarına imrâr u îsâl ve baʻdehû cenge faysal verüp, geldikleri mahalle ʻinân-tâb-ı bagy u dalâl olduklarını Bender Serʻaskeri lede't-tahkīk Ordu-yi hümâyûn'a tenmîk ve böyle bir fursatın fevti zımnında engüşt-hâ-yı te’essüf ve ʻadem-i müsâʻade-i kaderi behâne ve zuhûr eden kusûrunu setr içün baʻzı aʻzâr-ı vâhiye îrâd u ibâne ile sîne-kûb-ı tehassür ü telehhüf oldu. Nazm: Ve ʻâcizü'r-reʼyi mizyâʻün li-fursatihî Hattâ izâ fâte emrün ʻâtebe'l-kaderâ. kāyid-i ceyş olanlara her hâlde şerîta-i intibâh ve teyakkuza riʻâyet ve ahvâl-i aʻdâyı istiknâh ile vâkıf-ı keyfiyyet ve baʻdehû iktizâsı ne ise icrâsına mübâşeret emr-i ehemm olduğu gayr-i mübhemdir. Düşmen-i mekkâr hasmına zafer bulmak içün her bâr gavta-hûr-ı bahr-ı gîr-gûn endîşe ve ihtilâs-ı vakt-i fursat ile bir nevʻ mazarrat [25b] îrâsını ʻâdet ü pîşe eylediği âşikâr iken Bender'de hâb-âlûd-ı gaflet ve bir sâʻat mahalle dek aʻdânın geldiğine vukūf-ı tahsîl etmemek nakīsesinden başka, ol kadar ehl-i İslâm'ın mukayyed u maglûl o tarafdan mürûrlarını ʻadem-i ihsâs muktezâ-yı belâdet-i tabîʻat ve belki cinâyet-i sarf ve mahz-ı hıyânetdir. Birkaç mâh mukaddem Bender imdâdına taʻyîn olunan Varnalı-zâde Vezîr Selîm Paşa hulûl-ı ecel-i mevʻûduyla ʻâzim-i dâr-ı bekā olup, ol havâlî ru’esâdan hâlî kalmamak içün mukaddemâ Eflak tarafına meʼmûr, Zereli-zâde Vezîr ‘Abdullah Paşa'nın meʼmûriyyeti Bender'e tahvîl ve Özi Serʻaskerliği dûş-i hamiyyetine tahmîl olunan Cezâyirli Vezîr Hasan Paşa'nın nâmzed olduğu hıdmete bakılmayıp, iktizâsına göre lâzım olan mahalde istihdâmı taraf-ı hümâyûn'dan işʻâr u emr olunmuş bulunduğuna binâ’en, takdîm-i ehemm kāʻidesine riʻâyet ile müşârun ileyhin İsmâʻîl'e ve andan Bender'e lühûk u vusûliyçün ısdâr-ı fermân ve sâbıkā İsmâʻîl Serʻaskeri Zihneli Vezîr Hasan Paşa'nın dahi Kavşan'da ikāmetine irâde cereyân ve ʻaskerin ol havâlîde ʻalâ-vechi'l-ikmâl tehaşşüd ü ictimâʻı lâzıme-i hâlden olmağla o esnâda Ordu-yi hümâyûn'a vürûd eden Sirozî İsmâʻîl Bey müstashibi olan süvârîyle cânib-i mezbûra taʻyîn ve Bender'de vukūʻ bulan şîve-i cüzʼiye müsteclib-i esbâb-ı takviye vü tarsîn oldu.