Sadrıa‘zam ve Serdâr-ı ekrem hazretleri Rusçuğ'a vürûdundan sonra tertîbât-ı seferiyyeye ibtidâr Ve Mâhâbe Meni'stişâr mefhûmu üzere erkân-ı devleti ihzâr ve bir meclis-i hâfil tertîbi ile cem‘-i kibâr u sıgār edüp, a‘dâ-yı dînin [24a] taraf taraf memâlik-i İslâmiyye'ye sû-yi kasd fikrinde oldukları ve Yaş Kasabası'nda hulûl-i vakt-i muhârebeye intizâren ikāmet üzere olan baş-ceneralleri Nemçe tarafından vürûd eyleyecek askere iltihâk ve zünnâr-bend-i vifâk olarak Bükreş üzerine gelecekleri havâdisâtı istirâk olunmağla "Mürettebât-ı Ordu-yi hümâyûn'dan olan levâzımât-ı mevcûde vâfî midir, değil midir ve ne vechile hareket etmek dîn ü devlete nâfi‘dir" deyü huzzâr-ı meclisi istintâk eyledikde, Yeniçeri Ağası cevâba ibtidâr ve piyâde askerinin ekseri vârid olup, kusûru dahi ‘an-karîb gelmek üzere olduğun iş‘âr vesâyir piyâde ocağları ağaları dahi mühimmât ve neferâtın ber-vech-i tekmîl vücûdunu ihbâr ‘akabinde mühimmât tahmîl olunacak hayvânâta sarf-ı ‘inân ve henûz müretteb olan mahallerden ʻadem-i vüsûlunu beyân ve ʻâm-ı mâzîde bî-vakt ü ibbân tertîbât-ı seferiyyeye şürûʻ olunduğundan, vaktiyle yetişemediği nümâyân olduğunu meʼmûrlar birbirini tasdîk eyleyerek, meydân-ı kīl ü kālde fürsân olmalarıyla mevkib-i hümâyûnun hareketi bahsine sevk-i kelâm olunup, şıkkaynın biri ihtiyâr olunmak emrinde erbâb-ı meşveretin her biri meknûn-ı zamîrini izhâr ve kimi hareketi ve kimi ʻadem-i hareketi ihtiyâr edüp, bilâhare Ordu-yi hümâyûn'un şimdilik tevakkufu tasvîb ü tahsîn ve sügūr-ı İslâmiye nükūd u zehâyir ve mühimmât u ‘asâkir tertîbi ile tahkîm ü tarsîn ve Kuban Hânı Kavşan tarafına gidüp, aʻdâya sedd-i metîn olmak ve Bender etrâfını gezend-i hasm-ı şûmdan vikāye ve ne tarafdan zuhûr ederler ise, tertîb-i sâk u tılâye eyleyerek tahrîk-i re’ye ve Özi Serʻaskeri nasb olunan Vezîr Cezâyirli Hasan Paşa'ya dahi istiʻcâl emri gönderilüp, bir ân akdem İsmâʻîl'e varmak [24b] husûsları karâr-gîr oldukdan sonra Yaş Kasabası'nda tecemmuʻ eden aʻdâ-yı dîn keyfiyyeti der meyân olunup, o tarafa dahi kaviyyü'ş-şekîme bir başbuğ nasb olunmak husûsu karâr gîr-i ehl-i tebdîr olmağla, Ordu-yi hümâyûn'da el-hâletü hâzihî vüzerâdan bir kimesne bulunmayup, Ordu-yi hümâyûn konakcısı olan Kemânkeş Mustafâ Paşa'nın tîr-i evc gîr-i ehliyyeti nâfiz-i hedef-i isâbet-i erbâb-ı meşveret olup, başbuğ nasb olunması emrinde taraf taraf ifrâğ-ı caʻbe-i tedbîr eylediklerine binâ’en, o hıdmete fi'l-hâl tahsîs ve takviye-i bâzû-yı iktidârına medâr olan mühimmât ü levâzımât ne ise, taleb ü iddiʻâda mûmâ ileyh terhîs olunup, ol bâbda lâzım gelanlere ‘alâ-vechi'd-dakkati tenbîh ü tavsiye ve erbâb-ı meşverete ruhsat ʻavd verilüp, meclis tahliye olundu. Kethudâ-yı Sadrıaʻzamî olan Hasan Efendi'nin kuvvet-i baht ile tâliʻi muhkem u saht ve her mevsimde merâtib-i âliyyeye irtikā ile cebel-i Kāf, irâd-ı devleti fe’s-i iʻtisâf ile naht eylediğinden gayri, derece-i ʻakl ü şuʻûrdan sâkıt ve kâffe-i nâsa min gayr-i sebeb bâgız u sâhıt olup, bu makūle sıfât-ı zemîme ile muttasıf olanların hatb-ı cesîm-i Devlet-i ʻaliyye'de istihdâmları mûceb-i tekevvün-i âfât ve mûris-i gavâyil u mehâfât olduğu maʻlûm-ı Şehriyâr-ı bâhirü'l-kerâmât olmağla, ʻazl ve âharının nasbı irâdesine mebnî, meşveretden iki üç sâʻat mürûrunda Defterdâr-ı vakt olan Râşid Süleymân Efendi Sadâret-i ʻuzmâ Kethudâlığı'yla nâyil-i merâm ve Defterdârlık câh celîli ile es-Seyyid Feyzullah Efendi bekâm ve Defter Emâneti ile Kethudâ-yı maʻzûlün tevsen-i harûn-ı kibr ü enfesi ilcâm olundu.