Müşârun ileyh taʻyin-i nisebinde her ne kadar rivâyet muhtelif ise dahi Çelik Mehmed Paşa dâyiresinde cihân-bîn-i teʻayyün ve fenn-i silahşorîde yekke-süvâr-ı mızmâr-ı tefennün olup, giderek müşârun ileyh Hazînedâr ve baʻzı mahallere tarafından mütesellim nasb olunarak mûcib-i refâh-ı ahyâr ve bâʻis-i mezellet-i eşrâr olmuşidi. Tâyife-i levendât içinde şiddet-i fetk ü batş ile nâmdâr ve nice serkeşlerini kantara-i şemşîr-i âbdârdan imrâr ve hatta bir defʻa Şâm Valîsi tarafından baʻzı [22a] mahallere ihdâ olunmak üzere vâfir akmişe-i girân-behâ, Âsitâne-i saʻâdet'e isrâ olunup, hılâl-i râhda evbaş-ı levendât hediyyeyi gāret eyledikleri şâyiʻ olup, beher hâl eşyâ-yı mezkûrenin bulunması irâde olunduğuna binâ’en, Çelik Paşa tarafından müşârun ileyh meʼmûr olup, fi'l-hâl ʻinân-rîz-i ılgār ve üç günlük yolu Yekşenbih râh eyleyerek levendlere yetişüp, vâfirini tuʻme-i tîğ-i hûn-bâr ve bir hılâl zâyiʻ olmaksızın eşyâ-yı mezkûreyi istirdâd ve bu mukābelede Mîr-i mirânlık derecesine isʻâd olunup, seferler zuhûrunda Livâʼ-i şerîf ile Bender'e vürûd ve külliyetlü kapu ile isbât-ı vücûd edüp, Hotin'e ber-vech-i imdâd tesyîr ve o taraflarda dahi behâdırlık ile şöhret-gîr ve rütbe-i vezârete kesb-i istihkāk u ehliyyet ve bir vakt-i yesîreden sonra tahsîl-i ʻunvân-ı vezâret edüp, Özi muhâfazasına nâmzed ve iki üç sene kadar mukābele-i aʻdâda rûyîn-i sedd olup, ne tarafdan aʻdâ ser-nümâ oldu ise müşârun ileyh mazhar-ı teʼyîdât-ı Hakk ve her mukābelede aʻdâ-yı dîne gālib-i Mutlâk olup, baʻdehû Mora vesâyir eyâletlere vâlî ve geşt ü güzâr eylediği mahallerde tanîn-endâz-ı mesâmiʻ olan hüsn-i sît ü iştihârı rütbe-i kadrini ʻâlî edüp, Halîl Hamîd Paşa'dan sonra nâyil-i Sadâret-i ʻuzmâ ve pâ-nihâde-i süllem-i Vekâlet-i kübrâ olup, sinîn-i ʻömrü taşralarda murûr eylediğine binâ’en, hafâyâ-yı umûr-ı devleti fehm edemediğinden gayri, cehl-i müfrit sebebi ile serâyir-i devletle ecânibin bi'z-zarûre vukūfu lâzım gelüp, bu sebeble şîrâze-i nizâm-ı Saltanat ber-hemzede-i inhilâl ve râbıta-i umûr-ı Devlet, giriftâr-ı ʻukde-i teşvîş ü ihtilâl olup, Sadâret'den maʻzûl ve İsmâʻîl cânibi Serʻaskerliği ile mükerreren nâyil-i eʻazz-i meʼmûl olunmuşiken hatb-i cesîm-i Serʻaskerî'yi idârede mütekāsır olduğu maʻlûm-ı Hudâvend-i memdûhü'l-meʼâsir olmağla hakkında iğbirâr-ı Şâhâne husûlüyle tuğ ve sancağı refʼ olunup, nefy olunduğu Bozcaada'ya ʻâzimen Gelibolu'ya vürûdunda girîbân-ı hayâtı giriftâr-ı [22b] ser-pençe-i ecel oldu. Müşârun ileyh cerî vü cesûr ve taşralarda istihdâm olunacak bir vezîr-i gayûr olduğundan fazla salâh-ı hâl ile maʻrûf ve hilye-i istikāmetle mevsûf bir destûr-ı vakūr idi.