Basra etrafında mütemekkin-i kabâyil-i ʻArabdan olup, kesret-i havâşî ve vefret-i mevâşî ile müştehir olan Müntefik Şeyhi'nin ruʻûnet ü huşûneti ve ʻuhdesinde olan emvâl-i mîrînin edâsında teʻannüd ü muhâlefeti teʻdîb ü gûşmâlini muktezâ olmağla, Bağdad Vâlîsi Vezîr Süleymân Paşa şeyh-i merkūm üzerine vâfir ‘asker taʻyîn ve zâfir olduğu hînde âhar şahsı ʻaşîret-i mezkûreye Şeyh etmekle o havâlîde tehaddüs eden fitneyi teskîn ve Basra'ya dahi Mustafâ Ağa nâmında ağalarından birini mütesellim nasb edüp, zabt u rabt-ı memleket tenbîhâtını gereği gibi telkīn etmişidi. Mütesellim-i merkūm tesvîlât-ı şeytâniyyeye tebaʻiyyet ile şeyh-i matrûdu celb ü istishâb ve garaz-ı fesâdını icrâ içün âteş-i fitneyi karîn-i iltihâb ve müşarun ileyhin itâʻatinden hurûc ve zirve-i bagy u tuğyâna ʻurûc ile cemʻ-i haşerât ü erâzil nehren ve berren katʻ-ı şevâriʻ vü menâzil eylediği semʻ-i yakīnine vâsıl oldukda kapusunda mevcûd olan ecnâd ile ümerâ-yı ekrâdı cem‘ ü ve tertîb ve bi'n-nefs Basra üzerine hareket ile şeyh-i maʻzûlü teʼdîb ve köhne-binâ-yı cem‘iyyetini tahrîb edüp, mütesellim-i merkūm ile hevâdârı olan şeyh firâr ve nasb-kerdesi olan şeyhe kemâ kân istikrâr verüp, ol havâlîye şeyh nasb eylediğinden fazla bir muʻtemed kimesneyi dahi mütesellim nasbı ile defʻ-i gāyile-i hâyile eylediği ahbârını şâmil irsâl-i kabâle ve etrâfda tekevvün-i ihtilâl ü teşvîşi bi'l-külliye izâle eylediği mütehakkık oldukda mezruʻa-i a‘mâline cûy-bâr-ı [23a] ʻinâyet-i Şâhâne isâle ve Dergâh-ı ʻâlî kapucu başılarından ʻAbdî Bey ile teşrîfât-ı hümâyûn ve istihsânı şâmil-i emr-i mekârim meşhûn irsâliyle kutr-ı ʻIrak'ın kâffe-i umûru ʻuhde-i kifâyetine ihâle kılındı.