Hudûd-ı Devlet-i ʻaliyye'ye mücâvir olan fırak-ı nasârâdan Leh cumhûru bu esnâda Devlet-i ʻaliyyeye mütemahhız-ı dost geçinüp, umûr-ı mülkiyyeye dâyir baʻzı vesâyâ-yı hafiyye ile bir elçi irsâlini miyânelerinde tasmîm ve Moskovlu ile muhârebe olunduğuna binâ’en yollar mesdûd olup, elçilerini âhar tarafdan hudûd-ı İslâmiyye'ye idhâl fikrinde olduklarını niyâz-nâmeleriyle ifâde vü tefhîm eylediklerine binâ’en, elçi-yi mesfûr Nemçe memleketinden murûr ile Venedik Körfezi'ne ve andan Gördüs İskelesi'ne gelüp, baʻdehû berren Âsitâne'ye gelmesi tasvîb ve mihmândâr sûretinde hâcegân-ı Divân-ı hümâyûn'dan İbdâl Mühürdârı Kâmilî Mustafâ Efendi taʻyîn ve Mâliye Vekâleti ile tatyîb olunup, lâzım gelan yol emriyle Baş-muhâsebe'den muhrec, taʻyînât sûreti yedine i‘tâ ve bir ân akdem hareket ile lâzıme-i mihmân-nevâzîyi icrâ etmek tarafına tenbîh ü îsâ olundu.