Müşârun ileyhimânın vazʻ ü hareketleri muhâlif-i tabʻ-ı Pâdişâh-ı kâm-kâr ve umûr-ı lâzımeleri rüʼyetinde ‘urûz-ı veleh ve hayret ile tekâsül ü kusûrları bedîdâr olduğundan gayri, teceddüd-i nevbet-i Saltanat takrîbi ile vukūʻ-ı tebeddülât ve zuhûr-ı tegayyürât, emr-i tabîʻi olup, erkân-ı dîn ü devlet olan zevât-ı müteşahhisânın dahi birer kerre halbe-i tecribe vü ihtibârda ser-ferân-ı hüner ü mâhiyet olarak mişvârları maʻlûm olmak kānûn hükmüne muvâfık ve siyâset-i mülkiyyeye mutâbık olmağla müşârun ileyhimâ mesnedlerinden tenzîl olunup, Şeyhulislâm-ı esbak Esʻad Efendi-zâde Mehmed Şerîf Efendi ʻâlim ü dindâr ve ʻafîf-i perhîz-kâr bir vücûd-ı sütûde-âsâr olmak takrîbi ile işbu Zilka‘de'nin yigirmi yedinci günü müşârun ileyh bu defʻa dahi hilʻat-i beyzâ-yı fetvâ ile mazhar-ı nevâziş ü ikrâm ve yed-i emânetine teslîm-i zimâm-ı umûr-ı ʻulemâ-yı a‘lâm kılınup, Kāyim-makāmlık câh-ı refîʻi dahi Beykoz'da bisât-ârâ-yı ikāmet ü ârâm olan Vezîr Silahdâr Mustafa Paşa'ya tevcîh ve umûr-ı seferiyyeye tekayyüd ü ihtimâm etmek üzere tarafına tenbîh olunup, selefi şimdilik Beykoz'da me’mûr-ı ikāmet ve kezâlik Şeyhulislâm-ı sâbık hânesinde zânû-zede-i istirâhat olmak niʻmetiyle kat-i [21b] Şehriyâr-ı vâlâ-menkıbet oldu.