Kağıthâne suyunda kazâ’en reʻâyâdan biri gark olup, keşfi içün iki yüz guruş mutâlebe ve sâhib-i lâşe ile muhâvere vü mücâvebe olunur iken, [21a] Şehriyâr-ı bâhri'l-kirâm'a keyfe-me't-tefeka tebdilen o havâlîden murûr ve keyfiyyete kesb-i ıttılâʻ vu ʻusûr buyurduklarında, [Mısra]ʻ: Kādî ki dedik, kaziyye maʻlûm. mefhûmunu Şeyhulislâm Efendi'ye ifâde ve Kadî'nın te’dîbini irâde buyurmalarıyla, derhâl bâ-işâret-i ʻaliyye mûmâ ileyh Burusa'ya nefy ü iclâ ve hakkında lâzıme-i te’dîb ü gûş-mâl icrâ olundu. [Mısra]ʻ: Mesâ’îbü kavmin ʻinde kavmin fevâ’īdü. mâ-sadakı üzere Muvakkatî olan ʻİzzet Bey mansıb-ı münhall ile ber-murâd ve tabîʻî kasr-ı mesâfe-i tarîke neyl ile mübtehic ü dil-şâd oldu.