Sanʻat-ı ateş-bâzî zuhûrundan mukaddem beyne'l-verâ hudûs eden şûriş u gavgā, seyf ü sinân ve tîr ü kemân ile teʻâtî vü icrâ ve seyf ü sinân iʻmâli makbûl-ı yekke-süvârân-ı vegā olduğu gibi sanʻat-ı tîr-endâzî dahi şücʻân-ı ʻArab ve ʻAcem bîninde emr-i muʻtenâ olup, mübârizîn-i ashâb-ı güzîn [20b] "rıdvânullâhu ʻaleyhim ecmaʻîn" taʻlîm ü teʻallümüne saʻy-ı beliğ ve ser-menzil-i kemâl-i rimâyete vusûl içün himmet ü ikdâmların bî-dirîğ ve hatta ahad-ı ʻAşere-i mübeşşere olan Saʻd bin Ebî Vakkās ki, sanʻat-ı rimâyet-i sehemde vasıl-ı derece-i kemâl ve hitâb-ı Saʻâdet-nisâbı "İrmi fedâke ebî" ile hâyiz-i sehmü's-sa'âde-i iclâl olmuşidi. Baʻzı melâhim ü gazavâtda remy-i tîr ile müstelzim-i hayr-ı kesîr ve katî çok küffârı matmûre-nişîn-i saʻîr etmekle, debdebe-i şânı felek-mesîr ve tîr-endâzlara mürşid ü pîr olduğundan gayri, cemʻiyyet-i düşmen-ı dîne remy-i nibâl olundukda lâ-mahâle isâbet eylediği sübût-yâfte-i sıhhat rivâyet ve bu sebeble her karn ü ʻasrda bu sanʻata rağbet ve ʻale'l-husûs mülûk-ı sâlife bi'n-nefs âzmâyiş ile tahsîl-i kuvve-i indifâʻ mazarrat ederleridi. Pâdişâh-ı Behrâm-denk ve Şehriyâr-ı Hûşeng-cenk dahi eser-i selefe i’tisâ ile bu sünneti icrâ ve belki hizebrân-ı âcâm-ı gazâ olan pür-dilân-ı müslimîni teşvîk ü iğrâ ʻazîmeti ile bu esnâda zîh-gîr-bend-i engüşter-i himmet ve tehî-sâz-ı tîrdân-ı mehâret ve vakt-i yesîrede müntehâ-yı fenn-i rimâyet ve ʻalâyim-i merkûze-i hâzır u gāyibe bi'l-münâsale leked-zen-i müsâbakat olup, mukaddemâ taraf-ı hümâyûnlarından taʻmîr olunan Okmeydânı fezâsına sâye-endâz-ı ikbâl ve ʻörf-i nâsda "Pehlivân" ıtlâk olunan efrâd-ı rumât hâzır oldukları hâlde tekye şeyhi olan efendi-i dergâh-ı Hüdâvend-i lâ yezâle refʻ-i dû-kef-i ibtihâl ü duʻâ-yı bekâ-yı ʻömr ve ikbâl-i Pâdişâhî'yi takdîm ile teʼyîd-i dîn ve nasr-ı mübîn niyâzlarını ikmâlden sonra şeyh-i mezkûr kāʻideleri üzere îdâʻ-i sırr-ı müstetir ve fi'l-hâl gamâm-ı cûd u inʻâm-ı Pâdişâhî munsabb u münhemirr olup, müteʻayyinân-ı nâsı ilbâs-ı hilaʻ ile hâyiz-i rehîne-i hubûr ve sâyirlerini bezl-i derâhim ü denânîr ile mesrûr buyurdular.