İskenderiyye Mutasarrıfı Mahmûd Paşa'nın muhâlif tavr u edeb hareketi ve emr-i Pâdişâhî'ye ʻadem-i itâʻati ve istibdâd-ı reʼy ile ol havâlîde olan tesallüf ü ruʻûneti ve hakkında zuhûra gelan tedbîrin bidâyet ü nihâyeti mücelled-i evvelde ber-vech-i tafsîl tahrîr olunmuşidi. Teceddüd-i Devlet ve teleʼlü’-i kevkebü's-saʻd-i Saltanat takrîbi ile hatî’ât-ı sâlife ve seyyî’ât-ı ânifesi ez-ser-i nev zebân-güzâr-ı tezekkür ve bir gāyile-i hâyileye giriftâr olacağını tefekkür ile rûz-şeb, ser-be-zemîn tehayyür olup, kurenâ-yı Devlet'den Şemseddîn Bey'in tınâb-ı himmetine rabt-ı kalb ve medâr-ı celb olur baʻzı ʻamel icrâsıyla vukūʻ-ı tehallüfü sevgend ü yemîn ile selb edüp, şöyle ki cerâyim-i güzeştesi ʻafv olunduğu hâlde, kıdem-i itâʻati merkez-i istikāmeti vazʻ ve serhadd-i Bosna'yı gezend-i aʻdâdan menʻ edeceğin ve nüfûz u iʻtibârına kuvvet gelmek içün bir nevʻ imtiyâz-ı cedîd ile tesʻîd, yaʻnî rütbe-i vezâretle menşûr-ı ikbâli tecdîd olunmak ilticâsında olduğunu mukaddemât-ı mümevvehe ile temhîd edüp, bu esnâda Devlet-i ʻaliyye iki devlet ile harb ü kıtâl üzere olmağla mûmâ ileyh üzerine asker taʻyîninde ʻusret ve ʻalâ-hâlihâ terk olunmasında mazarrat derkâr olup, şâyed bu sûretle ribka-i itâʻate duhûl ve bâ-husûs Bosna muhâfazasını der-ʻuhde vü kabûl etmiş bulunup, merkūmun her ne kadar kavl ü fiʻli mağşûş ve devâm ü sebâtı "Ke'l-ʻihni'l-menfûş" ise dahi merreten-baʻde-uhrâ tecribe vü imtihân olunmak irâdesiyle tevbe vü inâyeti makbûl ve silkü'l-le’âl-i vüzerâya medhûl olup, kavli fiʻline muvâfık ve tarz u reftârı teʻahhüd eylediği sûrete mutâbık olduğu hâlde icrâ-yı me’mûriyyet etmek üzere miyânede vâsıta olan Mîr Şemseddîn hilʻat-i vezâret ve menşûr-ı eyâlet ile taʻyîn olundu.