Donanma-yi hümâyûn kapudanları miyânında korsanlara galebe ile sefînelerine zafer-yâb olsak, Devlet-i ʻaliyye bizi mâl talebiyle izʻâc eyleyeceğinden gayri, Deryâ Kapudânı olan Cezâyirli Hasan Paşa hod-bîn ve "Menem dîger nîst" vâdîlerinde zâtını leys-i ‘arîn ve belki cebel-i Kāf gibi sâhib-i temkîn ʻadd edüp, Kapudanlık birinden yararlığa dâyir bir fiʻl-i nîkû sâdır olsa, bâdî-yi emrde tahsîn ve baʻdehû bir behâne bulup, mahallini zîr-i zemîn eyleyeceği zâhirdir. ʻİlleteyn-i mezkûreteyn olmasa [Mısra]‘: Ra’eyte semme kıtâlen şeyyebe'l-veledâ. makāleleriyle dest-zen-i hayf u efsûs olurlaridi. Kapudan Paşa'nın ʻazliyle ehad-ı ʻilleteyn zâyil ve bundan sonra dilâverân-ı deryâ mukābil-i süfün-ı aʻdâ olup, zafer-yâb-ı nefel ü ganîmet olduklarında taraf-ı Devlet'den katʻâ bir şey iddiʻâ olunmayup, belki hünerleri kadarı lutf u kereme nâyil [20a] olacağları beyânıyla sû-be-sû evâmir-i ʻaliyye neşr olunup, ʻillet-i bâkıyye dahi bu vechile karîn-i indifâʻ oldu.