Müşârun ileyh on sekiz seneye karîb müstakillen deryâya Kapudân ve baʻzı meʼmûriyyetlerde müsâʻade-i baht ile kesb-i nâm u şân ve temâdî-yi eyyâm-ı ikbâl ile iktinâ-yı emvâl-i firâvân etmişidi. Geçen sene Donanma-yı hümâyûn ile Karadeniz'e ʻazîmet ve bir iki mahalde sefâyin-i ʻadâ ile mukāvemet ve gālib u mağlûb maʻlûm olmayarak Özi semtlerine gelüp, Kılburun pîş-gâhında mevcûd sefâyin-i ʻadâ üzerine hücûm ve memerr-i sefâyin olan mahallin suları kalîl olup, gavr-ı mesâlik-i bahrı mukaddemce ihtibâr etmamiş bulunduklarından hîn-i hücûmda Donanma-yı hümâyûn'dan birkaç sefîne maʻdûm ve başterde mehter-hânesiyle giriftâr-ı dest-i hasm-ı şûm olup, bu hâl ile Boğaz'a vürûd ve hakkında bi'l-istişâre sû-yi kasd sûreti rû-nümûd olmuşiken, fedâ-yı mâl-i bî-şümâr ve yâverî-yi tâliʻ-i sâz-kâr ile bu vartadan dahi vâdî-yi selâmete resâ ve dâg-zen-i kulûb husemâ olup, Donanma-yı hümâyûn'un fetkini retk ve kesrini cebr ve sene-i sâbıkadan mükemmel donanma ile Karadeniz'e çıkmak teʻahhüdünde iken cülûs-ı hümâyûn vukūʻ ve sâl-i sâlifde olan fezâhat u kabâhati mesmûʻ olup, ʻazl ü tenkîl ve sinîn-i çendîden berü sâbitü'l-asl olan rütbe-i ikbâli tenzîl ve Deryâ Kapudanlığı evvelâ Mîr-i Mîrânlık ile ve sâniyen câh-ı vâlâ-yı Vezâret'le Kapudâne Giridî Hüseyin Paşa'ya tahvîl olunmuşidi. Ancak müşârun ileyhin kuvve-i mâliyesi bedîdâr ve tantana-i celâdeti miyâne-i sebük-magzân-ı zemânede evc-gîr-i iştihâr olup, [19a] "Bu makūle nâm-dâr-ı vezîr emr-i hatîrde niçün istihdâm olunmaz!" iʻtirâz-ı bâridini defʻ içün bir tarafa Serʻasker nasb olunması tasvîb olunup, mukaddemâ sû-yi tedbîr ü redâ’et re’yiyle giriftâr-ı dest-i aʻdâ olan Özi Kalʻası'nın istihlâsına nâmzed kılınup, evâhir-i şehr-i Şaʻbân-ı şerîf'de müşârun ileyhe iksâ-yı hilʻât ve ʻasâkir-i vâfire ile bir ân akdem hareket eylemesi nefsine mûceb-i selâmet olacağı hafîce tarafına remz ü işâret olundukda, cürûh-ı belvâya merâhim olan nükūd u derâhim nisârıyla tertîb-sâz-ı envâʻ-ı cünûd ve kemâl-i haşmet ü vakār ile şukka-güşâ-yı semt-i maksûd oldu.