Esâtîn-i dîn-i kavîm ve ʻimâd-ı bünyân-ı müstakīm olan ʻulemâ-yı aʻlâmın Kitâb [18a] u Sünnet üzere beyne'n-nâs icrâ-yı ahkâm etmek ve fasl-ı da‘vâ ve defʻi belvâ ve hakkı ihkāk ve bâtılı imhâk ile meslek-i ʻadl ü insâfa sülûk etmek muktezâ-yı me’mûriyetleri iken bir zemândan berü cehele-i nâs, tagyîr-i kisve vü libâs ile tarîk-i kazâya intihâc ve cesîm arpalıklar ve niyâbetlere tevellâ ile defʻ-i gāyile-i fâka vü ihtiyâc eylediklerinden gayri, senede birkaç def‘a fukarâya tevzî‘ olunan sâlyânenin "Defter akçesi" nâmıyla sülüsânını istihlâs ve sâyir mahsûlât-ı fukarâyı birer nevʻ şebîke ile iktinâs etmeleriyle, memâlik-i Pâdişâhî âşiyâne-i bûm u gurâb ve ahvâl-i reʻâyâ harâb-ender-harâb olduğu maʻlûm-ı Şehriyâr-ı ʻadâlet-meʼâb oldukda, o makūlelerin evvel emirde "Eteʼmürûne'n-nâse bi'l-birri ve tensevne enfüseküm" delîl-i katʻîsi ile ilzâm u ifhâmlarına intihâz ve safahât-i tabiʻât-ı sâbıkaları şimdilik rakam-zede-i ʻafv u igmâz kılınup, fî-mâ-baʻd kadılık olan mahallere mâ-dâme ʻözr-i şerʻîsi olmaya, mansıb sâhibi bi'n-nefs ʻazîmet ile ber-vech-i iʻtidâl hareket ve fukarayı sıyânet ve her hâlde sâlik-i meslek-i kanâʻat olmak ve arpalık ashâbı dahi müteşerriʻ ü perhîz-kâr ve müteverriʻ u dîndâr kimesneleri arpalıklarına gönderüp, mahsûlun humusunu Nâib'e iʻtâ ve kusûriyle iktifâ ve nüvvâb u kudât bu tenbîhâtı semʻ-i kabûl ile ısgā etmeyüp, kemâ-kân evzâʻ-ı sâlifelerinde pâ-ber-câ-yı taʻannüd olurlar ise, cerîde-i kudâtdan mahkûkü'l-ism olmak ʻukūbetine ʻadem-i kanâʻatle vücûh-ı uhrâ ile teʼdîb ve gûş-mâlleri icrâ olunmak ve bundan böyle dahi mülâzemet erbâb-ı ʻilm u fazîlete verilüp, nâ-ehl ü câhile verilmemek bâbında katʻiyyü'l-medlûl bir kıtʻa hatt-ı hümâyûn-ı [18b] şeref-rîz sudûr olup, mûcebince taraf-ı Kāyim-makāmî'den Sâdreyn hazerâtına buyuruldular. Tahrîr ü lisâna dahi mecâlis-i ʻadîdede müşârun ileyhimâya ve sâyire sûret-i mes’ele bâ-etrâfihâ ve ahkâmihâ tasvîr olundu.