Vezîr-i aʻzam Yûsuf Paşa dest-yârî-yi sadâkat-kârân-ı Devlet ile Nemçe memleketine duhûl ve tabur ce[n]ginde cehd ü tâkatını mebzûl ve Nemçeli'yi tazyîk ve cemʻiyyetlerin tefrîk edüp, hulûl-i şitâ sebebiyle Muhâdiye ve Nezarete semtlerinin istihkâmına mübâşeret ve taʻyîn-i vüzerâ vü zavâbit ile ol havâliye metânet vermişidi. ʻAskerî tâyifesinin mevsim-i şitâ hulûlünde iʻtiyâd eyledikleri ʻârıza-i teferruk u teşettüt kemâ-kân ser-zede-i teʻayyün ve herkes me’mûr oldukları mahallerden katʻ-ı peyvend-i karâr u temekkün eyledikleri, gayri çok geçmeden Nemçe düşmeni dahi kesb-i teneffüs ve zaʻf-ı hâli neferrüs edüp, Belgrad gibi bir kalʻa-i hasîn ü üstüvârı ve Eflak gibi bir memleket-i vesîʻü'l-aktârı bilâ-meşakkat nezʻ u istirdâd edüp, Moskovlu tarafından dahi Özi ve Bender kalʻaları ve Boğdan Vilâyeti zabt ve ahvâl-i sügūr u tuhûm ber-hemzede-i halel ü habt ve ber-mefhûm-ı "Lâ re’ye li-men lâ-yûtâʻ" tedbîr ü idâreden dahi ʻâciz olmağla, ʻazl ü infisâli pîrâmen-güzâr-ı hâtır-ı ʻâlî olup, müşârun ileyhden mühr-i şerîf'i alup, mukaddemâ Mora'da ve bu defʻa Nazarete ve Muhâdiye vakʻalarında hüsn-i sülûk ve behâdırlığı zâhir olan Melek Paşa Kethudâsı Vezîr Hasan Paşa'ya teslîm etmek üzere orduda Çavuş-başı olan Genc ʻOsmân Ağa'ya işbu şehr-i Ramazân'ın yedinci günü tebdîl hasekîsiyle bir kıtʻa hatt-ı hümâyûn irsâl olunmuşidi. Hasekî-yi merkūm mânend-i bâd kabûl, reh-neverd-i rukûb u nüzûl ve şehr-i Ramazân'ın on üçüncü günü Rusçuğ'a vusûl ve Çavuş-başı Ağa'nın haymesine duhûl [16b] edüp, Ağa-yı mûmâ ileyhi mahrem-râz ve hâmil olduğu hatt-ı şerîfi ibrâz eyledikde, fi'l-hâl Ağa-yı mûmâ ileyh Kethudâ Bey ve Re’îs Efendi'yi istishâb ve Sadrıaʻzâm'ın müstekarr olduğu haymeye şitâb ile irâde-i hümâyûnu irâd ve revh-i izâfî makāmında olan mühr-i hümâyûnu istirdâd eylediler. Yeniçeri Ağası olan Vezîr Hasan Paşa fermûde-i Cihân-bânî üzere mesned-i Kāyim-makāmî'ye iʻtilâ edüp, Sadr-ı sâbık'ı birkac nefer-i ittibâʻ ile Ziştovi'ye doğru tesyîr ve ihsân-ı Pâdişâhî olan emvâl ü eşyâsı dahi bilâ-te’hîr tarafına vusûl bulacağını tebşîr eyledikden sonra, Ağa-yı mûmâ ileyh matâyâ-yı istiʻcâle süvâr ve Vidin tarafına ʻinân-rîz-i ılgār olup, Vidin'e kurbiyyet husûlünde Sadr-ı cedîd'e diger hatt-ı hümâyûn şeref-resân-ı vürûd ve Ordu-yi hümâyûn'a serîʻan lühûku irâde-i Şehriyâr-ı zafer-mevʻûd olduğuna binâ’en, birkaç sâʻat mukaddem matiyye-rân-ı ʻazîmet olduğu Çavuş-başı Ağa'nın maʻlûmu oldukda, derhâl ricʻat ve Rahova kurbünde mülâkī-yi Sâhib-i devlet olup, mühr-i hümâyûnu teslîm ve sûret-i me’mûriyyetini tefhîm ʻakabinde bi'l-maʻiyye ʻazîmete karâr ve şeb-dîz-i istiʻcâle süvâr ve Rusçuğ'a karîb mahalle kudûmları erkân-ı devlete bedîdâr oldukda, îfâ-yı resm-i istikbâle kıyâm ve mukaddemce tertîb olunan Yemeklik mahallinde cüz’-i teneffüs ü ârâmdan sonra, şehr-i Ramazân-ı şerîf'in yigirmi beşinci günü Ordu-yi hümâyûn'a duhûl ü ilmâm ve uʻmûmu hilʻati ilbâsiyle ricâl-i Devlet'i mazhar-ı ikrâm-ı tâmm eylediler. Nâşid Bey'in zâde-i tabʻı olan târîh-i sadâretdir. [Beyit]: Zamîrimden bu gûne etdim istihrâc-ı [17a] târîhin, Vekîl-i Şâh-ı ʻâlem oldu ʻizzetle Hasan Paşa. Çünki Sadr-ı sâbık Yûsuf Paşa'nın Eflak ve yâhûd Vidin Serʻaskeri olması içün irâde-i hümâyûn teʻalluk edüp, ahad-ı şıkkaynin tercîhinde Sadrıaʻzam muhayyer kılınmışidi. Vidin Serʻaskerliği el-hâletü hâzihî hâlî ve kaviyyü'ş-şekîme bir vezîrin o tarafda bulunması rekîz-i zamîr-i Sadr-ı ʻâlî olup, hemân Vezîr-i müşârun ileyh o tarafa Serʻasker nasb olunup, umûr-ı Serʻaskerî'ye dâyir olan tenbîhât-ı evâmir-i ʻaliyye ile tarafına inhâ ve ber-kadem-i akdem Ziştovi'den movement ve Vidin Ordusu'na iltihâkı husûsu te’kîd ü îmâ olundu.