Mühr-i cedîd-i Sultânî ve teşrîfât-ı seniyye-i Cihân-bânî ile bundan akdem Şemseddîn Bey [12a] Ordu-yi hümâyûn'a me'mûr olmuşidi. Tayy-i merâhil ve katʽ-i menâzil eyleyerek şehr-i Receb'in on dokuzuncu Bâzâr günü Ruscuk meştâsına vâsıl ve lede'l-istikbâl müretteb olan Dîvân'da Hatt-ı hümâyûn kırâ'at olunup, mevcûd olan vüzerâ-yı ʻizâm ve sâyir havâss u ʻavâma sürûr-ı kalb hâsıl olup, Sadrıaʻzam hazretleri mühr-i hümâyûn'u nihâde-ceyb-i iftihâr ve ferve-i semmûru zîver-ʻâtık-ı i'tibâr ve hançer-i mücevheri ârâyiş-i miyân-bend-i iktidâr edüp, cümleye hilʻat ilbâs ve birkaç günden sonra Mîr-i mûmâ ileyhi medâr-ı istînâs olan müteʻaddid ekyâs ile ircaʻ vü iʻâde ve Âsitâne'ye vusûl ile ʻatebe-i Mülûkâne'ye rû-nihâde oldukda, yegân yegân Ordu-yi hümâyûn ahvâlini takrîr u isrâra müteʻallik baʻzı umûr inhâsıyla takdîm-i ehemm kāʻidesini tezkîr eyledi.