Mevsim-i şitâ inkızâsıyla hulûl-i mevsim-i deryâ hüveydâ olduğuna binâ’en, Karadeniz'de müretteb olan Donanma-yı hümâyûn'un bir ân akdem seyr ü hareketi murâd-ı hümâyûn olmağla, işbu Şaʻbânü'l-muʻazzam'ın on dördüncü günü sefâyin-i Donanma nazar-gâh-ı Pâdişâh-ı deryâ-dilden imrâr olunup, Dolmabâhçe'de resm-i kadîm icrâsından sonra Kapudan Paşa savb-ı maksûda şirâʻ-güşâ oldu.