Eğribozlu vezîr İbrâhim Paşa merhûmun ferzend-i ercümendi olup Devlet-i aliyye'de baş-bâkī kulu ve sipâhîler ağası olan Bekir Bey-Efendi'nin evzâʿ ve etvârı müsellem-i ebnâ-yi zamân ve rüşd ü dirâyeti reşk-âver-i hûşmendân-ı deverân olduğundan gayri nakd-i ömrü tahsîl-i maʿârife masrûf ve inân-ı himmeti savb-ı tekmîl-i kemâlâta maʿtûf olup veraʿ ve takvâ âdet ve pîşesi ve safvet-i kalb ile Devlet-i aliyye'ye hizmet dâimâ fikr ü endîşesi olduğu vâkıf-ı ahvâl-i enâm olan pâdişâh-ı Dârâ-gulâma maʿlûm olmağla hakkında mehâil-i mekârim-i pâdişâhî nümâyân ve işbu Şabânü'l-muʿazzamın ikinci ahad günü aksâ-yi merâtib-i beşeriyye olan rütbe-i vâlâ-yi vezâretle mahsûdü'l-akrân buyurulduğundan fazla Mora mansıbı gibi kesîrü'l-intifâʿ bir mansıb ile dâire-i maʿîşeti tevsîʿ ve fi'l-asl tersâneli ile imtizâc ve ihtilâtı ve ricâliyle iʿtilâf ve irtibâtı olduğundan gayri pederinin kapudanlığı ve birâderinin Karadeniz başbuğluğu müşârün-ileyhi tezekküre sebeb olmağla binâberîn yevm-i mezkûrda Karadeniz donanması seraskerliğiyle dahi derece-i câhı terfîʿ olundu.