Bundan akdem hâlik olan Prusya kralına câ-nişîn olan kral-ı cedîd pâye-i serîr-i aʿlâya nâme ve hedâyâ gönderüp Âsitâne-i saʿâdet'de mukaddemâ maslahat-güzâr iken bu defʿa orta elçi nasb etdiği şahıs vâsıtasiyle takdîmini irâde eylediğine binâen birkaç gün mukaddem elçi-i mersûm Bâbıâlî'ye gelüp huzûr-ı sadrü's-südûrda ilbâs-ı ferve-i semmûr ile mesrûr olmuşidi. İşbu Cumâdel-âhirenin ondördüncü salı günü tertîb olunan dîvân-ı şâmihü'l-erkânda elçi-i mersûm pâye-i serîr-i aʿlâya vazʿ-ı cebîn-i meskenet ve kralın nâme ve hedâyâsını baʿde't-takdîm ilbâs-ı hilʿat ile hâiz-i rehîne-i mefharet oldu.