Kassâb başılık ilhâkıyla Tersâne-i âmire emîni olan Elhac İsmail Ağa'nın şimdiye dek me'mûr olduğu hidemât-ı Devlet-i aliyye'de hüsn-i idâresi mücerreb olmakdan nâşî bahr-i âtıfet-i pâdişâhî mevc-rîz-i zuhûr olup şehr-i mezkûrun ondördüncü sebt günü Bâbıâlî'ye da'vet ve dûş-i istihkāk ve istîhâline ilbâs-ı hil'at-i vezâret olduğundan gayri hasretü'l-vüzerâ olan Anadolu Eyâleti ile dahi menşûr-ı i'tibârı tezyîn ve şimdilik İsmail seraskeri sadr-ı sâbık Ali Paşa ma'iyyetine ta'yîn olundu. Münhal olan Tersâne-i âmire emâneti hazîne kethüdâsı esbak Raif Ali Efendi'ye ve kassâb başılık Tophâne nâzırı Mehmed Emin Ağa'ya tevcîh olunup yevm-i mezkûrda Karaman Eyâleti dahi Vezîr Esseyyid Ahmed Paşa'ya ve Sivas Eyâleti Sinop muhâfazası şartiyle Vezîr Mikdâd Ahmed Paşa'ya ve Adana Eyâleti İbrâil muhâfazası şartiyle Vezîr Mahmud Paşa'ya ve Bender Sancağı kal'ası muhâfazası şartiyle İçel mutasarrıfı Vezîr İzzet Mehmed Paşa'ya tevcîh olundu.