Dîn ü devlete adû olan Moskovlu iklîm-i Kırım'a müstevlî olduklarında Şâhin Giray'ın nakş ber-âb kabîlinden olan hânlık ünvânını izâle ve imhâ ve bir mikdâr vezâif ta'yîni ile bir mahalde müşârün-ileyhi îvâ ve iskân etmişler idi. Müşârün-ileyhin bu hilâlde Ahmed Efendi nâm âdemisiyle der-i devlet-medâra tahrîrâtı gelüp me'âli memâlik-i mahrûse-i Devlet-i aliyye'den Deşt-i Kıpçak'a mürûr isticâzesinden ibâret (297-a) ve âdemisi merkūmun takrîrine dahi ba'zı keyfiyyet ihâle etmiş bulunduğundan istintāk ile keşf-i serîre-i hâle mübâderet olundukda Kırım cenerali devletinin ta'lîmi ve tarafına müte'allik ba'zı devâ'înin husûlü ümidiyle hân-ı müşârün-ileyhin tekdîr ve tahkīrine hasr-ı vakt hattâ bu hılâlde memâlik-i Rusya'dan fekk-i râbıta-i ârâm ve memâlik-i Devlet-i aliyye'ye atf-ı zimâm eder isen Rusyalu tarafından sana ruhsat vardır mu'âmelelerini îhâm ile müşârün-ileyhe kâğıt tahrîr ve istiskāl olunduğunu hiss ile hân-ı müşârün-ileyh beni bu tarafa tah- rîrâtiyle tesyîr edüp kendüsü cevâb-ı tahrîrâta intizâren âheste-reftâr ile Leh memleketine doğru müteveccih olduğunu takrîr etmekle husûs-ı mezkûr zımnında erkân-ı devlet birkaç defa akd-i encümen-i meşveret edüp herkes netîce-i hevâtırını tasrîh ve bilâhire memâlik-i mahrûse-i pâdişâhîye da'vet ile ebnâ-yi cinsi gibi bir mahalde ikāmet etdirilmesi hususunu tercîh eylediklerine binâen derhal da'veti mutazammın hân-ı müşârün-ileyhe der-i devlet-medârdan tahrîrât irsâl ve te'lîf ve istimâlesini mûcib olur mukaddemât bastiyle îfâ-yi lâzıme-i vakt ü hâl kılındığından gayri dergâh-ı âlî kapucu başılarından sabıkā baş bâkī kulu İsmail Ağa mihmândâr nasb u taʿyîn ve Hotin'den hân-ı müşârün-ileyhi alup Bükreş'e ve andan Edirne'ye îsâl husûsu ağa-yi mûmâ-ileyhe tavsiye ve telkin olunup yollarda emr-i muhafazasına kıyâm ve ikrâm ve ihtirâmına ihtimâm etmek sûretinde mîrimîrân-ı kirâmdan Kavşan muhafızı İsmail Paşa dahi me'mûr olup güzergâhda vâkiʿ olan menzâil ve merâhilde (297-b) iktizâ eden zâd u zahîresi tehyi'e ve tanzîm ve lâzım gelen bahalarının bir mikdârı havâle ve bir mikdârı nakden teslîm olunmuşidi. Bu esnâda müşârün-ileyhin tekrar der-i devlet-medâra tahrîrâtı gelüp mukaddem ve muahhar hakkında bazı kelâm zebân-güzar-ı enâm olduğuna binâen havf u haşyeti telmîh ve taraf-ı pür-şeref-i mülûkâneden te'mîne muhtâc olduğunu îrâd ve tasrîh etmekle bu niyâzı dahi hüsn-i müsaʿafeye karîn ve münasib olduğu vech üzere emr-i te'mîn dahi vücûda geldiği tarafına îmâ ve tenbîh olunup o esnada mihmândâr dahi Hotin'e vusûl bulmuş olmağla hân-ı müşârün-ileyhe emniyyet hâsıl ve Hotin cânibine ubûr ile P[r]ut başında âmâde kılınan konağa nazil olduğunu Hotin muhâfızı ve sâirleri tahrîr ve işaret etmişler.