Mâ-beyne'l-haremeyn mütemekkin olan urbânın cânib-i Mısır'dan muʿtâd olan surreleri birkaç seneden berü tamaʿa mebnî verilmediğinden mîr-hacc-ı Mısır olanlar beher sene mürûr u ubûrda azîm zahmet çeküp hattâ bir-iki defʿa Medîne-i münevvere'ye uğramaksızın turuk-ı mechûleden cânib-i Mısır'a azîmet etmişler idi. Bu sâl dahi ne hâl ise Mekke-i mükerreme'ye geldiklerinde ihtiyâten tarîk-i şarkīden peyrev-i hüccâc-ı Şam olarak avdetleri tenbîh olunmuşiken adem-i isgā ile tarîk-i fürûʿdan azîmeti ihtiyâr ve Medîne-i münevvere'ye üç merhale kaldıkda leyl ü nehâr vukūʿ-ı fırsata intizâr üzere olan urbân yemîn ü yesârlarından nümâyân olup güzeşte surrelerini mutâlebe ve giderek ağâz-ı muhârebe etmeleriyle urbânın kesreti ve mîr-hacc-ı Mısır'ın adem-i kuvveti mülâbesesiyle urbân galebe edüp mahmil-i Mısrîyi ahz ve hüccâcı gāret ve bu hâl ile Medîne'ye avdetlerinde Şam vâlisi âdem taʿyîn edüp livâ ve mahmil-i Mısrîyi tahlîs ve mîr-hacc-ı Mısır'a eğerçi teslîm edüp ancak Mısır hüccâcı bu kazā-i nâgeh-zuhûr hasebiyle Medîne'den bir hatve ileri ve harekete kudret-yâb olmadıklarını ve mîr-hacc-ı Mısır dahi bundan sonra emâret-i hacc idâre edemeyeceğini beyân akabinde Cezzâr Paşa tarafından levâzımât-ı zarûriyyeleri görülüp Beyâdülganem nâm mahalle dek istishâb olunmuşlar idi. Kesret-i nüfûs ve hayvanât sebebiyle me'kûlât ve meşrûbâta kıllet tareyânını Mısır hüccâcı müşâhede ile menzil-i mezkûrdan (293-b) mufârakate hâhişger olduklarına binâen Mısır yeniçeri ocağı'ndan Yusuf Ağa nâm şahsı vâfir asker ile Cezzâr Paşa kāfileye serdâr edüp lâzım gelen mühimmât ve zahîrelerin tertîb ve cânib-i Mısır'a tesrîb eylediğini vezîr-i müşârün-ileyh bu defʿa vârid olan tahrîrâtında eğerçi derc ü tastîr etmiş ancak birkaç gün mürûrunda kapudan paşa hazretlerinin bu hususa dâir cânib-i Mısır'dan mufassal tahrîrâtı gelüp hüccâc-ı Mısır'a isâbet eden hasâret Şam vâlisinin iğmâzından neş'et eylediğini beyân ve işâret etmiş.