İşbu şehr-i Rebîül-evvelin onikinci günü Mekke-i mükerrem'e kazâsı şurût-ı ma'lûmesiyle sâbıkā Edirne kādısı Halîl Cevdet Efendi'ye ve Medine-i münevvere kazâsı yine şurûtiyle sâbıkā Şam kādısı İmâm Bekir Efendi-zâde Mehmed Emin Efendi'ye ve Edirne kazâsı Şaban gurresinden zabt etmek üzere sâbıkā Üsküdâr kādısı Mustafa İsâmeddin Efendi'ye ve Bursa kazâsı Cumâdel-ulâ gurresinden zabt etmek üzere kudüs pâyesi olup sâbıkā Yenişehr-i Fener kādısı Fevzi-zâde Mustafa Şükrullah Efendi'ye eğerçi tevcîh olunup ancak birkaç gün sonra vefât etmekle kazâ-i mezbûr bi-hasebi't-tarîk Konevî Hamza Efendi'ye tevcîh ve hâric mevleviyetleriyle dahi ba'zı mevâlî-i devriyyenin hâlleri terfîh olundu.