İşbu tevcîhâtda kapucu-başı Halebli Mehmed Ağa menâsıb-ı ümenâdan birini taleb ve tahsîli zımnında ricâl-i Bâbıâlî'yi mübtelâ-yı kedd ü taʿab etmişidi. Semîr-i zamîri olan mansıbın rukabâsında kesret ve adem-i sebk tecrübe ile zâtında fıkdân-ı ehliyyet tahallüf-i hamline illet olup İstanbul Baruthânesi nezâretiyle bâdî-i emirde kesb-i neşât ve hizzet ve baʿdehû kıllet-i menfaʿat ve vücûd-ı hasâret mülâhazalariyle mukaddemât-ı lâğıyeye mübâşeret edüp şöyle ki mûmâ-ileyhin kapu kethüdâsı olduğu vüzerâda zuʿmûna göre vâfir alacağı olup baʿzısının fevti ile re'sü'l-mâl iktidârı karîn-i izmihlâl ve sûret-i servet ve yesârı müşrif-i zevâl olduğu ân be-ân beyân ve dâire-i nezâretde aczini îzân edüp Baruthâne umûru Devlet-i aliyye'nin ehemm-i umûrundan olup kayd-ı intifâʿ gāilesiyle mukayyed olanlar filhakīka idaresinden âciz olacakları min-ecle'l-bedîhiyyât olmağla adem-i fevt-i maslahat irâdesiyle derhâl mûmâ-ileyh azl olunup sadr-ı esbak Mehmed Paşa'nın hazînedârı kapucu-başı Çelebi Ağa İstanbul Baruthânesi nâzırı nasb olundu.