Belgrad kal'ası müntehâ-yı sugūr-ı islâmiyyede vâki' kılâ'-ı pâdişâhîden olup (282-b) me'mûr-ı muhâfazası olan vulât-ı kirâma vücûd-ı celâdet ve adem-i fütûr u rehâvet şart olduğundan gayri zuhûr-ı fesâda sebeb-i âdî olan hâlâtı destiyârî-i hüsn-i tedbîr ile mukaddemce izâle etmek lâzım iken Belgrad muhâfızı Vezîr Mahmûd Paşa bu dakīkadan gâfil olup izâhe-i es- bâb-ı münkerât ve imâte-i ilel-i menhiyyâta muvaffak olamadığından Belgrad serhaddinde ihtilâl ve fesâd zuhûr ve yamaklar taraflarından hâric ez-vazîfe baʿzı hâlât sudûr etmeğe başlayup ez-cümle Nemçe tüccârından biri sebebi mukaddemâ defʿ olunmamış bir emr-i münkerde bulunup te'dîbi içün zikr olunan yamaklar zâbitânı haberdâr etmek muktazî iken izhâr-ı şiddet ve be's ve hod-be-hod tâcir-i mesfûrun hânesini kebs ve yeniçeri ağası vâkıf-ı kaziyye oldukda sürʿat ile mahall-i muʿârekeye yetişüp mesfûru yedlerinden ahz ü habs irâde etdikde ağayı dinlemeyün tâcir-i mesfûru katl ve istîsâl ve bu madde içün Nemçelü îrâd-ı kīl ü kāl eylediklerinden defʿan li'l-nizâʿ muhâfız-ı müşârün-ileyhin azlinde isrâʿ olundu. Silistre muhâfazası şartiyle Sivas Eyâleti tevcîh olunan Vezîr Abdi Paşa'nın seraskerlikden infisâli hasebiyle kapusu halkı mükemmel olup Silistre'de mukîm olduğu hâlde azm-i vakʿ u şân mülâbesesiyle rü'yet-i umûr-ı nâsa tasaddî edeceği nümâyân ve Silistre Eyâleti İsmâil seraskerliği ile sadr-ı sâbık Ali Paşa hazretlerinin uhdesinde olup eyâletinde âharın icrâ-yı ahkâm etmesi lâ-mehâle tabʿına girân geleceği ve bu sebeble imyânelerinde (283-a) âsâr-ı nefret rû-nümûn ve yek-diğeri tahrîr ile Devlet-i aliyye'yi tasdîʿden hâlî olmayacakları maznûn olmağla Belgrad Abdi Paşa'ya ve Silistre muhâfazası şartiyle eyâlet-i Sivas Mahmud Paşa'ya işbu Zilkaʿdenin sekizinci sebt günü tevcîh ve ihsân olundu.