Muvakkaten Anadolu muhâsebecisi olan Penâh Süleyman Efendi derd-i cânkâh-ı tâ'ûn ile işbu Zilka'denin onikinci çarşamba günü dest-şûy-i âlem-i fânî ve âzim-i mülk-i câvidânî olup mahlûl olan mansıbı sipâh kâtibi olan Şehrî Mehmed Efendi'ye ve sipâh kitâbeti kâtib-i sâbık Hasan Efendi'ye tevcîh olundu. (283-b) Tercüme: Mûmâ-ileyh Mora cezîresinde vâki' Trabliçe kasabası sükkânından İsmâʿîl Efendi nâm kimesnenin oğlu olup bin yüz otuzbeş târihinde meşîme-çâk-i şuhûd ve giderek fenn-i kitâbeti tahsîl ile fârık-ı miyân-ı bûd ü nebûd olup ba'de mine'z-zemân Küçük Mustafa Paşa merhûma kâtib-i dîvân ve iltimâsına mebnî dâhil-i zümre-i hâcegân olmuşidi. Sadr-ı esbak Mustafa Paşa sadâretinde küçük tezkereci ve ba'dehû kethüdâ kâtibi olup müşârün-ileyh mağzûben sadâretden munfasıl oldukda mûmâ-ileyhe tarafgirlik töhmeti isnâd olunmakdan nâşî kitâbetden ma'zûl ve Yedikule'de üç gün mahbûs ve mahzûl oldukdan sonra Magosa kal'asına tağrîb ve dokuz mâh mürûrunda Bursa'ya nakl olunmağla Âsitâne'ye takrîb olunmuşidi. Bursa'da dahi dokuz mâh ikāmet ve bundan sonra itlâk ile nâil-i meserret olup bir müddet mürûrunda mâliyye (284-a) tezkereciliği ile makziyyü'l-âmâl ve o esnâda sefer vukū' bulup Ordu-yi hümâyûn'a irsâl olunmuşidi. İki sene sipâh kâtibi ve üç sene ale't-tevâlî baş muhâsebeci olup bu hâl ile Âsitâne-i saʿâdet'e vürûd ve iki def'a şehremâneti ve suvâri mukābelesi ve iki def'a Anadolu muhâsebeciliği ile isbât-ı vücûd edüp bu tevcîhâtda muvakkaten tekrâr Anadolu muhâsebecisi olmuşiken defter-i ömrü dest-i muhâsebe-i ecel ile tayy olundu. Mûmâ-ileyh tarîk-i sâdât-ı sûfiyyeye mâil ve ba'zı meşâyihden telâkkī-i ezkâr ile murâkabât ve teveccühâta müştegıl olup Arabî ve Türkî mukaffâ ve mevzûn eş'ârı ve Yûnus Dede'ye muʿârız ilâhiyyât tarzında âsârı olup kâffe-i ahvâlinden muktasıd ve bir pîr-i müsta'id idi.