Emîr-i rekb-i Şâmî olan Vezîr Cezzâr Ahmed Paşa'ya bundan akdem hükm-i hümâyûn gönderilüp berren Mısır cânibine me'mûr olan Diyârbekir vâlîsi Vezîr Güğeği Abdî Paşa'nın hevâyic-i asliyye ve levâzım-ı zarûriyyesini bilâ-taksîr rü'yet ve tanzîm ve an-asıl mesbût-ı cerîde-i zihnî olan ahvâl-i Mısriyeyi müşârün-ileyhe telkīn ve tefhîm eylemesi husûsu tahrîr ve terkīm olunmuşidi. Müşârün-ileyh emr ü tenbîh olunduğu vech üzere Abdî Paşa'nın iktizâ eden zehâir ve levâzım-ı sâiresini alâ-vechi'l-ekmel tesviye ve tertîb ve birkaç katar katır ve on kıt'a zenbûrek ve iki donanmış esb ile müşârün-ileyhi terhîb eylediğinden gayri der-i devlet-medârdan irsâl olunan hazîne vaktiyle müşârün-ileyhe vusûl bulmayup fıkdân-ı nakd ile dûçâr-ı çâr mevce-i ıztırâb olduğunu tahkīk etmekle derhal elli kîse meblağ ile dahi umûrunu teshîl ve savb-ı maksûda tesbîl etdiğini ve bu hatb-i cesîmin tanzîmi akabinde cemmâze-rân-ı râh-ı Hicâz olduğunu arz u tahrîr etmiş masârif-i hac nukūd-ı vâfireye muhtâc idüğü müsellem iken hîn-i hareketde Şâm vâlîsi tarafından nümâyân olan gayret sâlifü'l-beyân hak budur ki nakş-i sahîfe-i istihsân olmağa şâyândır.