Kāhire-i Mısr'da kāmet-efrâz-ı bağy ü dalâl olan ümerâ-i bergeşte ahvâlin kuvve-i kāhire-i mülûkâne ve himmet-i kûh-efgen-i (281-b) hüsrevâne ile tenâhhî ve firârları tahakkuk eylediğine binâen mahlûl olan mukātaʿalararının fürûhtu ve sinîn-i çendinden berü der-i devlet medâra göndermedikleri irsâliye hazînelerinin tahsîli ve bakāyâ ve cibâyet-i cizye ve mürettebât-ı sâ'irenin temşiyeti içün Devlet-i aliyye'den bir müteʿayyin zâtın me'mûriyyeti iktizâ etmekle binâberîn mukaddemâ İstanköy'de ikāmeti fermân olunup baʿdehû Bodrum'da inşâ olunan sefâini tekmîl zımnında me'mûriyyeti tecdîd olunan re'îsülküttâb-ı esbak Feyzullah Efendi'nin bu makūle umûr-ı mâliyyede mahâreti zâhir ve âşikâr ve bâ-husûs devlet-i ebed-müddetde defterdarlık ve riyâzet-i hizmetlerinde istihdâm ile hâiz-i rehîne-i vakʿ u iştihâr olup bu hatb-i cesîmin irâde-i devlet ve tabîʿat-i vakt üzere rü'yet ve temşiyetine muvaffak olacağı melhûz ve me'mûr olmağla kapudan-ı deryâ vezîr Gāzî Hasan Paşa hazretlerinin emr ü re'ylerine tebaʿiyyet ile umûr-ı mezkûreyi tanzîm etmek bâbında tarafına hitâben emr-i celîlü'ş-şân ısdâr ve baş muhâsebe kâtiblerinden maʿiyyetine bir kâtib dahi taʿyîn ve tisyâr olundu.