Şehr-i mezkûrun yirmisekizinci günü dîvân-ı muʿallâ-erkân tertîb olunup Fas hâkimi tarafından nâme ve hedâyâ ile vürûd eden Elhac Talib Abbas bûse-gâh-ı kâffe-i nâs olan atabe-i pâdişâh-ı cem-câha vazʿ-ı cebîn-i taʿzîm ve hâmil (281-a) olduğu nâmesini kānûn üzere teslîm ve evkāf ve havassa dâir olup ulemâ-i mağrib miyânelerinde izzet ve nedreti muʿayyen ve tehlîl ismiyle muʿanven ve tarafı beş kıtʿa elmas ile müzeyyen bir cild kitâb ve bir kebîr sâʿat ve birkaç sandık fağfûr ve billûr evânî ve bir sandalye ve bir araba ve bir küreden ibâret olan hedâyâyı dahi takdîm edüp bundan başka otuzbeşer zirâʿdan mükemmel iki kıtʿa sefîne ve kırkaltı pâre demir top dahi mukaddemce arz olunmuş olmağla Dîvân-ı hümâyûn'da sefîr-i mûmâileyhe hilʿat ilbâs ve ser-i iftihârı gerdûn-mümâs kılındı. Bir gece mukaddem Mısır cânibinden nüvîd-i meserret ve berîd-i beşâret vârid olduğuna binâen tertîbât-ı Mısriyede sadrıaʿzam hazretlerinin peyveste-i mevkiʿ-i şuhûd olan ikdâm ve himmetleri nezd-i ferd-i mülûkânede karîn-i pesend ve tahsîn olduğundan gayri bundan böyle kahr u tedmîr-i ehl-i fesâd ve kalʿ-ı usûl-i ashâb-ı küfr ü inâd zımnında izhâr-ı mesâʿî-i mevfûre ve ibrâz-ı me'âsir-i meşkûre kılınmak bâbında bir kıtʿa hatt-ı mekârim-eser ve bir kabza hançer-i süreyyâ-cevher dîvân mahalline şeref-resân-ı vürûd olup taraf-ı sadr-ı bî-humâlden hutuvât-ı iclâl ile istikbâl ve zikr olunan hançer zîver-i miyân-bend-i iclâl olundukdan sonra hatt-ı hümâyûn alâ-melâ'i'n-nâs kırâ'at olunup ehl-i dîvâna mûcib-i dikkat ve bâʿis-i tezâyüd-i şevk ü himmet oldu.